Aktyor Alisher Uzoqov jurnalist Dilshoda Matjonovaga bergan intervyusida kinodan ketishining sabablari, san’at o‘rnini egallayotgan vaynerlar va uni xasadchilikda ayblayotganlarga o‘z munosabatini bildirib o‘tdi.
— Men kinodan butunlay uzildim. Buning sabablari juda ko‘p. Oxirgi 10 yilda birorta yaxshi ssenariy qo‘limga tushgani yo‘q. Agar teatrda “Otasining qizi”, “Kelinlar qo‘zg‘oloni” yoki “Andishali kelinchak” darajasidagi spektakl sahnalashtirilganda, baribir xalq og‘ziga tushgan bo‘lardi. Afsuski, teatr ishlayapti, kinolar suratga olinyapti. Ammo ularning hech biri tomoshabin nazariga tushayotgani yo‘q. “Qilindimi-qilindi” tarzida qolib ketyapti. “O‘zi kinoda suratga tushmayotgani uchun tanqid qilyapti”, degan xayolga borishlarini istamayman. Men yoki falonchi aktyor suratga tushgan taqdirda ham, avvalgidek kinolar bo‘lmaydi. Ya’ni rejissorlarning aktyorgacha bo‘lgan muammolari ko‘p. Eng birinchisi ssenariy bilan bog‘liq bo‘lsa, keyingisi moliyaviy muammolarga borib taqaladi, — deydi aktyor.
Alisher Uzoqov “Mendirman Jaloliddin”da suratga tushmaganidan achinmasligi va shundan keyin ko‘p filmlarning kastingidan o‘tolmagani haqida aytib o‘tdi.
— “Mendirman Jaloliddin” serialini suratga olish maydonchasidan nega ketib qolganim haqida ko‘p gapirganman. Chunki rejissor o‘zbek aktyoriga aktyordek munosabatda bo‘lmagan. “Mana bu rol senga va sen serialning hamma qismida ko‘rinasan”, degan. Ammo menga rolning katta-kichikligi emas, o‘sha serialda uning qanchalik ahamiyatli ekanligi muhim edi. U yerda nafaqat o‘zbek aktyoriga, balki millatga nisbatan bo‘lgan munosabat yoqmagani uchun ketganman. Men tabiatan shunday insonman, yoqmadimi, ketaman. Qaytgandan keyin balki noto‘g‘ri xulosa qilgandirman, deb biroz ikkilandim. Ammo ko‘p o‘tmay, qarorim to‘g‘ri ekanligini tushunib yetdim. Undan keyin uchta yaxshi filmga kasting topshirdim. Ulardan biri “Ilhaq” edi. Jahongir Ahmedov bilan avval ham ishlaganmiz, bir-birimizni yaxshi tushunamiz. Ammo u filmiga olmadi. Uning ham qarorini hurmat qilaman. Undan keyingi kastingidan o‘tolmagan filmlarim esa hali ham ekranga chiqqani yo‘q, — deydi aktyor.
Alisher Uzoqov “1000 so‘m bering, akajonlar” degan qo‘shig‘i bilan “Xalqlar do‘stligi” san’at saroyi sahnasiga chiqqan bolani keskin tanqid qilgandi. Videomurojaatidan so‘ng ko‘pchilik uni xasadchilikda ayblaganiga o‘z munosabatini bildirdi.
— Men aynan bolani emas, balki san’at shu darajaga yetib borganini tanqid qilganman. “Kinolarda suratga tushmayapsizmi, shuning uchun xasad qilyapsiz”, deb yozayotganlar balki bilishmas, Toshkentdan Mo‘ynoqqacha borib, iste’dodlarni izladik. Avtobusda uzoq masofaga yurish qanchalik qiyin ekanligini yaxshi bilishadi. Agar kichik yoshdagi bolaning “mashhurligiga” xasadim kelsa, 5 yoshli Shahramning ijodini qo‘llab-quvvatlamagan bo‘lardim. Men iste’dodli yoshlar ko‘paysa, xursand bo‘laman, ammo bu katta sahnada “1000 so‘m bering” deb qo‘shiq kuylash kerak, degani emas. Bu bola bir-ikki oydan keyin “2000 so‘m bering” deb qo‘shiq aytgani bilan avvalgisidek shov-shuv bo‘lmasligi mumkin. Ammo muammoning ildizi boshqa. Ya’ni Rossiyada ham vaynerlar bor, ularning hazil videosi ham ommalashib, ijtimoiy tarmoq yulduzi bo‘lishi mumkin. Ammo u yerda vaynerlik bilan birga asl san’at ham bor. Teatr va kino o‘z oyog‘ida harakat qilyapti, oqsoqlanib qolgani yo‘q. Bizda esa kino va teatr yo‘qolib borayotgani uchun vaynerlar hammaning ko‘ziga yomon ko‘rinyapti. Go‘yoki san’atning buzilishiga vaynerlar aybdordek. Men hamkorlik qilayotgan jamoada o‘ndan ortiq vaynerlar bor. Eng qizig‘i, ularning 80 foizi san’at oliygohida o‘qigan va aktyor degan diplomga ega. Ammo ular teatr va kinoda o‘z o‘rnini topolgani yo‘q. Shuning uchun ham vaynerlik qilib yuribdi, — deydi aktyor Alisher Uzoqov.
Izoh (0)