Актёр Алишер Узоқов журналист Дилшода Матжоновага берган интервьюсида кинодан кетишининг сабаблари, санъат ўрнини эгаллаётган вайнерлар ва уни хасадчиликда айблаётганларга ўз муносабатини билдириб ўтди.
— Мен кинодан бутунлай узилдим. Бунинг сабаблари жуда кўп. Охирги 10 йилда бирорта яхши сценарий қўлимга тушгани йўқ. Агар театрда “Отасининг қизи”, “Келинлар қўзғолони” ёки “Андишали келинчак” даражасидаги спектакл саҳналаштирилганда, барибир халқ оғзига тушган бўларди. Афсуски, театр ишлаяпти, кинолар суратга олиняпти. Аммо уларнинг ҳеч бири томошабин назарига тушаётгани йўқ. “Қилиндими-қилинди” тарзида қолиб кетяпти. “Ўзи кинода суратга тушмаётгани учун танқид қиляпти”, деган хаёлга боришларини истамайман. Мен ёки фалончи актёр суратга тушган тақдирда ҳам, аввалгидек кинолар бўлмайди. Яъни режиссёрларнинг актёргача бўлган муаммолари кўп. Энг биринчиси сценарий билан боғлиқ бўлса, кейингиси молиявий муаммоларга бориб тақалади, — дейди актёр.
Алишер Узоқов “Мендирман Жалолиддин”да суратга тушмаганидан ачинмаслиги ва шундан кейин кўп фильмларнинг кастингидан ўтолмагани ҳақида айтиб ўтди.
— “Мендирман Жалолиддин” сериалини суратга олиш майдончасидан нега кетиб қолганим ҳақида кўп гапирганман. Чунки режиссёр ўзбек актёрига актёрдек муносабатда бўлмаган. “Мана бу рол сенга ва сен сериалнинг ҳамма қисмида кўринасан”, деган. Аммо менга ролнинг катта-кичиклиги эмас, ўша сериалда унинг қанчалик аҳамиятли эканлиги муҳим эди. У ерда нафақат ўзбек актёрига, балки миллатга нисбатан бўлган муносабат ёқмагани учун кетганман. Мен табиатан шундай инсонман, ёқмадими, кетаман. Қайтгандан кейин балки нотўғри хулоса қилгандирман, деб бир оз иккиландим. Аммо кўп ўтмай, қарорим тўғри эканлигини тушуниб етдим. Ундан кейин учта яхши фильмга кастинг топширдим. Улардан бири “Илҳақ” эди. Жаҳонгир Аҳмедов билан аввал ҳам ишлаганмиз, бир-биримизни яхши тушунамиз. Аммо у фильмига олмади. Унинг ҳам қарорини ҳурмат қиламан. Ундан кейинги кастингидан ўтолмаган фильмларим эса ҳали ҳам экранга чиққани йўқ, — дейди актёр.
Алишер Узоқов “1000 сўм беринг, акажонлар” деган қўшиғи билан “Халқлар дўстлиги” санъат саройи саҳнасига чиққан болани кескин танқид қилганди. Видеомурожаатидан сўнг кўпчилик уни хасадчиликда айблаганига ўз муносабатини билдирди.
— Мен айнан болани эмас, балки санъат шу даражага етиб борганини танқид қилганман. “Киноларда суратга тушмаяпсизми, шунинг учун хасад қиляпсиз”, деб ёзаётганлар балки билишмас, Тошкентдан Мўйноққача бориб, истеъдодларни изладик. Автобусда узоқ масофага юриш қанчалик қийин эканлигини яхши билишади. Агар кичик ёшдаги боланинг “машҳурлигига” хасадим келса, 5 ёшли Шаҳрамнинг ижодини қўллаб-қувватламаган бўлардим. Мен истеъдодли ёшлар кўпайса, хурсанд бўламан, аммо бу катта саҳнада “1000 сўм беринг” деб қўшиқ куйлаш керак, дегани эмас. Бу бола бир-икки ойдан кейин “2000 сўм беринг” деб қўшиқ айтгани билан аввалгисидек шов-шув бўлмаслиги мумкин. Аммо муаммонинг илдизи бошқа. Яъни Россияда ҳам вайнерлар бор, уларнинг ҳазил видеоси ҳам оммалашиб, ижтимоий тармоқ юлдузи бўлиши мумкин. Аммо у ерда вайнерлик билан бирга асл санъат ҳам бор. Театр ва кино ўз оёғида ҳаракат қиляпти, оқсоқланиб қолгани йўқ. Бизда эса кино ва театр йўқолиб бораётгани учун вайнерлар ҳамманинг кўзига ёмон кўриняпти. Гўёки санъатнинг бузилишига вайнерлар айбдордек. Мен ҳамкорлик қилаётган жамоада ўндан ортиқ вайнерлар бор. Энг қизиғи, уларнинг 80 фоизи санъат олийгоҳида ўқиган ва актёр деган дипломга эга. Аммо улар театр ва кинода ўз ўрнини тополгани йўқ. Шунинг учун ҳам вайнерлик қилиб юрибди, — дейди актёр Алишер Узоқов.
Изоҳ (0)