O‘zbekistonda yozda qanday mavsumiy ishchilarga talab oshgani ma’lum bo‘ldi

O‘zbekistonda eng talabgir mavsumiy ishchilar sotuvchilar bo‘ldi. Bu haqda “Daryo”ga “hh.uz” xabar berdi.

Aksariyat fuqarolar o‘zlariga qo‘shimcha ish topib, pul ishlash payida bo‘ladi. Yoz buning uchun ayni paytidir. 2023-yilning may oyidan iyun oyining o‘rtalarigacha bo‘lgan davrda “hh.uz” saytida qo‘shimcha pul topish uchun umumiy bo‘sh ish o‘rinlari soni 1,5 mingtaga yetdi, bu o‘tgan yilning shu davriga nisbatan 87 foizga ko‘pdir.

Pul ishlab topishning deyarli barcha shakllari o‘sib bormoqda: kuniga 4 soatdan ishlashdan tortib, tungi, dam olish kunlari ishlashgacha va hokazo.

Bugungi kunda deyarli istalgan kasb egalari o‘zlariga qo‘shimcha ish topishlari mumkin. Ko‘pincha bunday vakansiyalarni chakana savdo vakillari (umumiy vakansiyalarning 17 foizi) axborot texnologiyalari (15 foiz), mehmonxonalar va restoranlar sohasidagi (12 foiz) ish beruvchilar e’lon qiladi.

Eng talabgir mavsumiy ishchilar sotuvchilar bo‘ldi. Yozda qo‘shimcha pul topish bo‘yicha vakansiyalarning 44 foizi sotuvchi-konsultant va sotuvchi-kassachilar hissasiga to‘g‘ri kelgan. Bu yozda savdo oshishi, shu sababli ish beruvchilar ko‘proq xodimlar jalb etishi bilan bog‘liq.

Bu sohada ish vaqti ancha qulay: tezkor mehnat shartnomasi tuzib, 4-6 soatli qisqa smenali ishga olishlari yoki ishga yollanuvchi shaxs uchun boshqa qulay variantlar ko‘rib chiqilishi mumkin.