Ўзбекистонда ёзда қандай мавсумий ишчиларга талаб ошгани маълум бўлди

Ўзбекистонда энг талабгир мавсумий ишчилар сотувчилар бўлди. Бу ҳақда “Дарё”га “hh.uz” хабар берди.

Аксарият фуқаролар ўзларига қўшимча иш топиб, пул ишлаш пайида бўлади. Ёз бунинг учун айни пайтидир. 2023 йилнинг май ойидан июнь ойининг ўрталаригача бўлган даврда “hh.uz” сайтида қўшимча пул топиш учун умумий бўш иш ўринлари сони 1,5 мингтага етди, бу ўтган йилнинг шу даврига нисбатан 87 фоизга кўпдир.

Пул ишлаб топишнинг деярли барча шакллари ўсиб бормоқда: кунига 4 соатдан ишлашдан тортиб, тунги, дам олиш кунлари ишлашгача ва ҳоказо.

Бугунги кунда деярли исталган касб эгалари ўзларига қўшимча иш топишлари мумкин. Кўпинча бундай вакансияларни чакана савдо вакиллари (умумий вакансияларнинг 17 фоизи) ахборот технологиялари (15 фоиз), меҳмонхоналар ва ресторанлар соҳасидаги (12 фоиз) иш берувчилар эълон қилади.

Энг талабгир мавсумий ишчилар сотувчилар бўлди. Ёзда қўшимча пул топиш бўйича вакансияларнинг 44 фоизи сотувчи-консултант ва сотувчи-кассачилар ҳиссасига тўғри келган. Бу ёзда савдо ошиши, шу сабабли иш берувчилар кўпроқ ходимлар жалб этиши билан боғлиқ.

Бу соҳада иш вақти анча қулай: тезкор меҳнат шартномаси тузиб, 4-6 соатли қисқа сменали ишга олишлари ёки ишга ёлланувчи шахс учун бошқа қулай вариантлар кўриб чиқилиши мумкин.