Yakshanba kuni O‘zbekiston hududiga Kavkaz hududlaridan nisbatan salqin va nam havoning yana bir qismi kirib keladi, deb xabar bermoqda “O‘zgidromet”. 20-iyun kuni Kavkaz hududlaridan nisbatan biroz salqin havo kirib kelgandi.
Qayd etilishicha, 23–24-iyun kunlari respublika bo‘yicha asosan kam bulutli va o‘rtacha issiq ob-havo saqlanib turadi. Havo harorati 33-38 daraja, Surxondaryo viloyatida baʼzi joylarda 42-44 daraja atrofida bo‘ladi.
25-iyun kuni Kavkaz hududlaridan nisbatan salqin va nam havoning yana bir qismi kirib keladi. Respublika bo‘yicha bulutlilik kuchayadi, Qoraqalpog‘iston Respublikasi, Xorazm, Buxoro va Navoiy viloyatlarida baʼzi joylarda qisqa muddatli yomg‘ir yog‘ishi, momaqaldiroq bo‘lishi mumkin.
Harorat yana 2-4 darajaga, yoz fasli uchun qulay bo‘lgan 31-34 darajagacha, janubda baʼzi joylarda 38-40 darajaga pasayadi. Salqin havo kechasi va ertalab seziladi, kechasi harorat 15-18 darajagacha pasayadi.
Tog‘oldi va tog‘li hududlarda 24–25-iyun kunlari baʼzi joylarda qisqa muddatli yomg‘ir yog‘ishi, momaqaldiroq bo‘lishi mumkin.
Toshkentda shanba kuni kechga tomon va yakshanba kuni shamol tezligi 12-15 metr/sekundgacha kuchayishi mumkin. Havo harorati 23–24-iyunda 34-36 daraja, 25-iyunda 31-33 daraja bo‘ladi.
Izoh (0)