Ўзбекистонда дам олиш куни ҳаво ҳарорати пасаяди

Якшанба куни Ўзбекистон ҳудудига Кавказ ҳудудларидан нисбатан салқин ва нам ҳавонинг яна бир қисми кириб келади, деб хабар бермоқда “Ўзгидромет”. 20 июнь куни Кавказ ҳудудларидан нисбатан бир оз салқин ҳаво кириб келганди. 

Қайд этилишича, 23–24 июнь кунлари республика бўйича асосан кам булутли ва ўртача иссиқ об-ҳаво сақланиб туради. Ҳаво ҳарорати 33-38 даража, Сурхондарё вилоятида баъзи жойларда 42-44 даража атрофида бўлади.

25 июнь куни Кавказ ҳудудларидан нисбатан салқин ва нам ҳавонинг яна бир қисми кириб келади. Республика бўйича булутлилик кучаяди, Қорақалпоғистон Республикаси, Хоразм, Бухоро ва Навоий вилоятларида баъзи жойларда қисқа муддатли ёмғир ёғиши, момақалдироқ бўлиши мумкин.

Ҳарорат яна 2-4 даражага, ёз фасли учун қулай бўлган 31-34 даражагача, жанубда баъзи жойларда 38-40 даражага пасаяди. Салқин ҳаво кечаси ва эрталаб сезилади, кечаси ҳарорат 15-18 даражагача пасаяди.

Тоғолди ва тоғли ҳудудларда 24–25 июнь кунлари баъзи жойларда қисқа муддатли ёмғир ёғиши, момақалдироқ бўлиши мумкин.

Тошкентда шанба куни кечга томон ва якшанба куни шамол тезлиги 12-15 метр/секундгача кучайиши мумкин. Ҳаво ҳарорати 23–24 июнда 34-36 даража, 25 июнда 31-33 даража бўлади.