Qashqadaryo viloyatining barcha tumanlarida “Yoshlar oyligi” va 30-iyun — “Yoshlar kuni” munosabati bilan “Yangi O‘zbekiston yoshlari, birlashaylik”, shiori ostida yoshlar sayli bo‘lib o‘tmoqda.
Bu haqda “Daryo”ga xabar bergan Mirishkor hamda Dehqonobod tumani hokimliklariga ko‘ra, hududlarda yoshlarga kayfiyat ulashish maqsadida sanʼatkorlar ishtirokida konsert dasturlari ham bo‘lib o‘tmoqda.
Mirishkor tumani hokimligi axborot xizmati rahbari Azizbek Yazdurdiyevning aytishicha, tuman markazida hokimlik, sog‘liqni saqlash boshqarmasi, tibbiyot birlashmasi va yoshlar ishlari bo‘limi hamkorligida “Hech bir yosh eʼtibordan chetda emas” shiori ostida salomatlik sayli tashkil etilgan.
“Prezident Shavkat Mirziyoyev raisligida 2023-yilning 11-aprel kuni o‘tkazilgan videoselektor yig‘ilishida yoshlarni eʼtibor va g‘amxo‘rlik bilan to‘la qamrab olish maqsadida ular ‘mahalladan vazirlikkacha’ tizimi orqali davlat idoralariga biriktirilishi belgilangandi.
Mirishkorda ham toifalarga ajratilgan yoshlar tashkilot rahbarlariga biriktirib chiqildi. Shunga asosan, nogironligi bo‘lgan va surunkali kasalliklari bo‘lgan yoshlar hamda ularning yaqinlari uchun aksiya doirasida mamlakatimizdagi ilk chuqurlashtirilgan tibbiy ko‘rik o‘tkazilib, 313 nafar nogironligi bo‘lgan yoshlar hamda 90 dan ortiq surunkali kasalligi bo‘lgan ‘Yoshlar daftari’dagilar 20 dan ortiq viloyatning malakali tibbiyot xodimlari tomonidan ko‘rikdan o‘tkazilib, kerakli tavsiya va yo‘llanmalar berildi”, — deydi Azizbek Yazdirdiyev.
Taʼkidlanishicha, har ikki tumanda ham oylik doirasida “Salomatlik uchun 5000 qadam” shiori ostida marafon, hokimlik, yoshlar ishlari bo‘limi, maktabgacha va maktab taʼlimi bo‘limi hamda respublika Maʼnaviyat va maʼrifat bo‘limlari hamkorligida iqtidorli yoshlar va ularning ota-onalari ishtirokida “Mening farzandim O‘zbekiston faxri” uchrashuvi, “Maʼrifat soati”, “Mening qonunim mening taqdirim” kabi qator tadbirlar o‘tkazilgan.
“Tadbir davomida yoshlarning iqtidorini namoyon etish va sportga keng jalb qilish maqsadida shaxmat bo‘yicha rokirovka turniri bo‘lib o‘tdi. Turnirda g‘olib o‘g‘il bolalar 5 ta o‘rin bo‘yicha pul mukofotlari bilan taqdirlangan bo‘lsa, qiz bolalar esa 3 ta o‘rin bo‘yicha rag‘batlantirildi”, — deydi Dehqonobod tumani hokimligi axborot xizmati masʼuli.
.jpg)
Har ikki tumanda ham yoshlar saylining yakuniy qismi konsert dasturi bilan davom etgan.
“Mirishkor tumani hokimi Sherali Sanayev tumanda yoshlar soni 61,4 ming nafardan ortiq ekanini, tuman aholisining qariyb 51 foizi yoshlar ekanini maʼlum qilib, davlat va xususiy sektorida rasmiy bandlar 2 466 nafarni, taʼlimda 9 530 nafarni, migratsiyaga ketgan yoshlar 1 327 nafarni, norasmiy bandlar esa 11 810 nafar kishini tashkil etishini bildirdi. Shuningdek, yil boshidan ‘Yoshlar daftari’ga kiritilgan 512 nafar yoshlarning 237 nafariga amaliy yordam ko‘rsatilib, ijtimoiy muammolari hal etilganini qo‘shimcha qildi”, — deydi Mirishkor tumani hokimi Sherali Sanayevning matbuot kotibi.
Hokimliklarning qo‘shimcha qilishicha, Mirishkorda 15 mingga yaqin ishtirokchi to‘plangan yoshlar festivalida xonandalar — Yodgor Mirzajonov, Afruza va “Marokand” guruhi ko‘tarinki kayfiyat ulashgan bo‘lsa, Dehqonobodda xonanda Bahriddin Zuhriddinov hamda aktrisa Sug‘diyona Azimovа ko‘rinish berib, yoshlarga kayfiyat ulashgan.
Izoh (0)