Қашқадарё вилоятининг барча туманларида “Ёшлар ойлиги” ва 30 июнь — “Ёшлар куни” муносабати билан “Янги Ўзбекистон ёшлари, бирлашайлик”, шиори остида ёшлар сайли бўлиб ўтмоқда.
Бу ҳақда “Дарё”га хабар берган Миришкор ҳамда Деҳқонобод тумани ҳокимликларига кўра, ҳудудларда ёшларга кайфият улашиш мақсадида санъаткорлар иштирокида концерт дастурлари ҳам бўлиб ўтмоқда.
Миришкор тумани ҳокимлиги ахборот хизмати раҳбари Азизбек Яздурдиевнинг айтишича, туман марказида ҳокимлик, соғлиқни сақлаш бошқармаси, тиббиёт бирлашмаси ва ёшлар ишлари бўлими ҳамкорлигида “Ҳеч бир ёш эътибордан четда эмас” шиори остида саломатлик сайли ташкил этилган.
“Президент Шавкат Мирзиёев раислигида 2023 йилнинг 11 апрель куни ўтказилган видеоселектор йиғилишида ёшларни эътибор ва ғамхўрлик билан тўла қамраб олиш мақсадида улар ’маҳалладан вазирликкача’ тизими орқали давлат идораларига бириктирилиши белгиланганди.
Миришкорда ҳам тоифаларга ажратилган ёшлар ташкилот раҳбарларига бириктириб чиқилди. Шунга асосан, ногиронлиги бўлган ва сурункали касалликлари бўлган ёшлар ҳамда уларнинг яқинлари учун акция доирасида мамлакатимиздаги илк чуқурлаштирилган тиббий кўрик ўтказилиб, 313 нафар ногиронлиги бўлган ёшлар ҳамда 90 дан ортиқ сурункали касаллиги бўлган ’Ёшлар дафтари’дагилар 20 дан ортиқ вилоятнинг малакали тиббиёт ходимлари томонидан кўрикдан ўтказилиб, керакли тавсия ва йўлланмалар берилди”, — дейди Азизбек Яздирдиев.
Таъкидланишича, ҳар икки туманда ҳам ойлик доирасида “Саломатлик учун 5000 қадам” шиори остида марафон, ҳокимлик, ёшлар ишлари бўлими, мактабгача ва мактаб таълими бўлими ҳамда республика Маънавият ва маърифат бўлимлари ҳамкорлигида иқтидорли ёшлар ва уларнинг ота-оналари иштирокида “Менинг фарзандим Ўзбекистон фахри” учрашуви, “Маърифат соати”, “Менинг қонуним менинг тақдирим” каби қатор тадбирлар ўтказилган.
“Тадбир давомида ёшларнинг иқтидорини намоён этиш ва спортга кенг жалб қилиш мақсадида шахмат бўйича рокировка турнири бўлиб ўтди. Турнирда ғолиб ўғил болалар 5 та ўрин бўйича пул мукофотлари билан тақдирланган бўлса, қиз болалар эса 3 та ўрин бўйича рағбатлантирилди”, — дейди Деҳқонобод тумани ҳокимлиги ахборот хизмати масъули.
.jpg)
Ҳар икки туманда ҳам ёшлар сайлининг якуний қисми концерт дастури билан давом этган.
“Миришкор тумани ҳокими Шерали Санаев туманда ёшлар сони 61,4 минг нафардан ортиқ эканини, туман аҳолисининг қарийб 51 фоизи ёшлар эканини маълум қилиб, давлат ва хусусий секторида расмий бандлар 2 466 нафарни, таълимда 9 530 нафарни, миграцияга кетган ёшлар 1 327 нафарни, норасмий бандлар эса 11 810 нафар кишини ташкил этишини билдирди. Шунингдек, йил бошидан ‘Ёшлар дафтари’га киритилган 512 нафар ёшларнинг 237 нафарига амалий ёрдам кўрсатилиб, ижтимоий муаммолари ҳал этилганини қўшимча қилди”, — дейди Миришкор тумани ҳокими Шерали Санаевнинг матбуот котиби.
Ҳокимликларнинг қўшимча қилишича, Миришкорда 15 мингга яқин иштирокчи тўпланган ёшлар фестивалида хонандалар — Ёдгор Мирзажонов, Афруза ва “Мароканд” гуруҳи кўтаринки кайфият улашган бўлса, Деҳқонободда хонанда Баҳриддин Зуҳриддинов ҳамда актриса Суғдиёна Азимова кўриниш бериб, ёшларга кайфият улашган.
Изоҳ (0)