Eronning dunyoga mashhur CinnaGen kompaniyasi saratonni davolashda foydalaniladigan dorilarni O‘zbekistonda ishlab chiqarmoqchi. Bu haqda Toshkentdagi Eron innovatsiyalar va texnologiyalar uyi (IHITT) bosh direktori Rasul Beheshtifar “Daryo” muxbiriga bergan intervyusida maʼlum qildi.
Bugun, 18-iyun kuni Toshkentdagi Eron innovatsiyalar va texnologiyalar uyining ochilish marosimi bo‘lib o‘tdi. Tadbirda yangi markazning muhim jihatlari to‘g‘risida fikr bildirildi.
Rasul Beheshtifarning aytishicha, IHITT Eron va O‘zbekiston o‘rtasidagi texnologik almashinuvni amalga oshirish, hamkorlik va sheriklikni rivojlantirish bilan shug‘ullanadi.
“Bu markazni tashkil etish orqali O‘zbekistonda ishlab chiqarilgan yangi texnologiyalarni Eronga, u yerdagilarini mazkur mamlakatga joriy etishni maqsad qilganmiz. Shu bilan birga, ilm-fan va innovatsion markazlar hamkorligini rivojlantirish, universitet hamda institutlar talabalarini yangi texnologiyalar bilan tanishtirishni rejalashtirganmiz. Dastlabki bosqichda energetika, tibbiyot, qishloq xo‘jaligi va axborot texnologiyalari yo‘nalishlarida ish olib boramiz. Hozirgacha ushbu sohalarda 30 dan ortiq kompaniyalar bilan bitimlar tuzishga ulgurdik va ular yaqin kunlarda O‘zbekistonga kelib, o‘zlarining innovatsion loyihalari bilan qatnashadi. Keyingi bosqichda bank, neft-gaz, kon sohalarida o‘z ishlarimizni amalga oshirmoqchimiz”, — dedi u.
Rasul Beheshtifarning qo‘shimcha qilishicha, Eronning dori-darmon ishlab chiqaruvchi CinnaGen kompaniyasi O‘zbekiston bilan hamkorlik qilishi kutilmoqda.
“O‘zbekiston delegatsiyasi Eronga tashrifi davomida CinnaGen xoldingida bo‘ladi va kompaniya faoliyati bilan tanishadi. Bugungi kunda kompaniya 300 dan ortiq turdagi dori mahsulotlarini ishlab chiqaradi. Xususan, saraton kasalligini davolashda qo‘llaniladigan 7-8 turdagi dorilar ham aynan o‘sha kompaniyada ishlab chiqariladi. Aytish kerakki, hozirda saraton kasalligini davolovchi dori mahsulotlarini dunyoda faqatgina ikkita kompaniya ishlab chiqaradi. Ulardan biri — CinnaGen’dir. Shuning uchun ham bu O‘zbekistonga juda qiziq. Bizning asosiy maqsadimiz mazkur turdagi dorilarni O‘zbekistonga nafaqat eksport qilish, balki O‘zbekistonning o‘zida ham ishlab chiqarishdan iborat”, — dedi bosh direktor.
Izoh (0)