Gretsiya huquq-tartibot idoralari O‘rta Yer dengizida muhojirlarni olib ketayotgan baliqchi qayiq halokatga uchrab, bir necha yuz kishining hayotiga zomin bo‘lgan ishni tergov qilishda yordam so‘rab Yevropolga (Yevropa Ittifoqi politsiya kuchlari) murojaat qildi. Bu haqda Deutsche Welle xabar berdi.
Tergov kontrabandada gumonlanib hibsga olingan to‘qqiz kishiga qaratilgan — ular halokatdan omon qolgandi. Ulardan biri hamon kasalxonada. 20—40 yoshlar orasidagi Misr fuqarolari odam savdosi, ehtiyotsizlikdan odam o‘ldirish va jinoiy tashkilot tuzishda ayblanmoqda. Gretsiyaning ERT telekanaliga ko‘ra, ular so‘nggi oylarda Liviya qirg‘oqlaridan Italiyaga 18 tagacha xavfli kema harakatini tashkil qilgan kontrabandachilar guruhiga mansub.
Yevropol yordami bilan gretsiyalik tergovchilar kontrabanda operatsiyasi tashkilotchilarini aniqlashga umid qilmoqda. Hibsga olinganlarning shaxsi boshqa tirik qolganlarning ko‘rsatmalari asosida aniqlangan. Hibsga olinganlardan biri bortda ishlash uchun pul olganini tan oldi, qolganlari esa barcha ayblovlarni rad etdi, deb yozadi Kathimerini gazetasi. Omon qolganlarning so‘zlariga ko‘ra, ular qayiqqa minish uchun kishi boshiga 5000 dan 6000 yevrogacha to‘lagan.
Gumonlanuvchilar 19-iyun kuni tergov sudiga kelishi kerak.
Gretsiya yaqinida Janubiy afrikalik muhojirlar qayig‘i cho‘kib ketdi
14-iyun kuni Gretsiya qirg‘oqlarida shimoliy afrikalik muhojirlar o‘tirgan baliqchi qayiq ag‘darilib ketdi. 100 dan ortiq odam qutqarib olindi. Qayiq bortida 700 nafargacha odam bo‘lgani taxmin qilinmoqda. Qolganlarni tirik topishga umid yo‘q ekani aytildi.
Qayiq taxminan 10-iyun kuni Liviyadan Italiyaga yo‘lga chiqqan. U Pilos shahri yaqinidagi xalqaro suvlarda cho‘kib ketgan. Rasmiylarning fikricha, hodisaga kemaning haddan ziyod ko‘p odamni olib ketayotgani sabab bo‘lgan.
Gretsiya hukumati uch kunlik motam e’lon qildi
Izoh (0)