Сурхондарё вилояти Узун туманидаги мактабда икки аёл ўқитувчи эркак ҳамкасби томонидан калтаклангани ҳақида хабар берилган эди. Олий суд матбуот хизматининг маълум қилишича, мазкур эркакка суд ҳукми ўқилди.
Унга кўра, 16 июнь куни жиноят ишлари бўйича Узун туман судида Г.Т. (1988 йилда Сурхондарё вилоятининг Сариосиё туманида туғилган, 31-сонли мактабнинг жисмоний тарбия ўқитувчиси бўлиб ишлаган)га оид жиноят ишини кўриб чиқиш бўйича очиқ суд жараёни тугаб, суд ҳукми эълон қилинди.
Эълон қилинган ҳукмга кўра, Г.Т. Жиноят кодексининг 277-моддаси (безорилик) 3-қисми “г” банди билан айбли деб топилиб, жиноят оқибатида икки нафар жабрланувчига етказилган маънавий ва моддий зарарлар қопланганлиги ҳамда уларнинг судланувчига нисбатан даъвоси йўқлиги инобатга олинган ҳолда унга 1 йил 6 ой муддатга озодликдан маҳрум қилиш жазоси тайинланди. Тайинланган жазони манзил-колонияларда ўташ белгиланди.
Ушбу қарордан норози тарафлар қонунда белгиланган тартиб ва муддатда Сурхондарё вилоят судининг апелляция инстанциясига шикоят бериш ва протест келтиришга ҳақлилиги айтилди.
Маълум қилинишича, воқеадан бир кун аввал шу мактабда ота-оналар йиғилиши бўлиб ўтган. Унда ота-оналарнинг бири томонидан ўқитувчиларнинг маънавий бузуқлиги ҳақида сўз борган. Исбот тариқасида ўзида видео борлигини ҳам айтган. Шундан сўнг аёл ўқитувчилар йиғилиб директорга айтиш мақсадида мажлис қилган. Ота-оналар томонидан айтилган видеони ўзига тегишли деб тушунган эркак ўқитувчи келиб мажлисга аралашган ва шу орада жанжал содир бўлган.
“Аёллар йиғилиши бўляпти, дедим. Кейин менга бирдан қараб, сенсираб, ‘Сенинг нима ишинг бор, мен ўзим биламан’, деди-да ўзи шаҳд билан устимга келди. Уни уради, деб кутмагандим. Тиззаси билан биқинимга тепди, кейин шеригим жойидан туриб, гапирмаслигимни илтимос қилди. У эса бизни тинимсиз сўкди. Тинимсиз сўккани сабабли мен яна гапирдим”, — дейди жабрланувчи аёл.
Мазкур аёл даволанаётган шифохона ходимининг сўзларига кўра, ҳозирда унинг аҳволи стабил ҳолатда.
“Бемор бизга бош оғриғи, кўкрак қафаси ўнг тараф биқин соҳасидаги оғриқдан шикоят қилиб келган. Ҳозирги кунда барча текширувларни ўтказганмиз. Унинг аҳволи ҳозирда стабил”, — дейди шифокор.
Изоҳ (0)