“Bir yildan beri do‘stlariga ulashib kelgan”. Pentagonning maxfiy hujjatlarini tarqatgan yigit haqida ma’lumot berildi

Pentagonning maxfiy maʼlumotlarini tarqatishda gumonlanayotgan AQSH harbiy-havo kuchlari zobiti Jek Teysheyra maxfiy hujjatlarni Ukrainada urush boshlanganidan beri do‘stlari bilan bo‘lishib kelgan. Bu haqda The Washington Post nashriga gumonlanuvchining tanishlaridan biri ma’lum qildi.

Nashr manbasining aytishicha, Teysheyra 2022-yilning fevral-mart oylarida Discord platformasidagi yopiq chatida maxfiy hujjatlarni nashr etishni boshlagan. Manbaning ta’kidlashicha, Teysheyra Ukraina va Rossiya urushidan xafa ekanini bildirgan, chunki uning fikricha, “bu ikki davlatni bir-biridan ajratib turadigan narsalardan ko‘ra, ularning umumiy jihatlari ko‘proq bo‘lishi kerak”.

WP suhbatdoshining ta’kidlashicha, Teysheyra hujjatlarni “o‘zi do‘st deb bilgan va ishongan odamlariga” propagandadan xoli ma’lumot berish uchun ulashgan. Manbaning qo‘shimcha qilishicha, chat ishtirokchilari bu ma’lumotni 20 kishilik guruhdan tashqariga chiqarmaslikka va’da bergan.

Gumonlanuvchining do‘sti aytishicha, Teysheyra AQSH milliy xavfsizligiga putur yetkazishni istamagan, balki shunchaki chat ishtirokchilarini vaziyatga to‘g‘ri baho berishga o‘rgatmoqchi bo‘lgan va buning uchun “o‘zi bilgan yagona usul”ni qo‘llagan.

Teysheyraning yana bir tanishi uni vatanparvar, dindor katolik va qurollarga qiziquvchi libertar (fuqarolar erkinligini yoqlovchi) deb ta’rifladi. Shuningdek, nashrning aniqlik kiritishicha, yigit harbiy oilada o‘sgan — o‘gay otasi 34 yillik harbiy xizmatdan so‘ng nafaqaga chiqqan, onasi esa uzoq yillar faxriylarga yordam ko‘rsatuvchi tashkilotlarda ishlagan.

FQB xodimlari Jek Teysheyrani 13-aprel kuni Massachusets shtatida hibsga oldi.

The New York Times gazetasining yozishicha, yigitni o‘nlab yillik qamoq jazosi kutayotgan bo‘lishi mumkin, chunki u tarqatgan har bir maxfiy hujjat katta ehtimol bilan, ishda alohida ayblov sifatida ko‘rsatiladi — ularning har biri uchun Teysheyra 10 yilgacha qamalishi mumkin. Yigit jami nechta hujjatni tarqatgani noma’lum. Reuters 50 dan ortiq maxfiy hujjatlarni o‘rgangan, biroq ularning umumiy soni yuzdan ortiq bo‘lishi mumkinligini taxmin qilmoqda.