АҚШ судининг ҳакамлар ҳайъати Пентагон махфий ҳужжатларини ошкор қилганликда гумонланаётган 21 ёшли Жек Тейшейрага айблов қўйди. Бу ҳақда АҚШ Адлия вазирлиги сайтидаги баёнотда айтилади.
Тейшейрага миллий мудофаа сирлари маълумотларини қасддан сақлаш ва узатишда олтита айблов эълон қилинди.
Тейшейра ижтимоий медиа платформаси фойдаланувчилари билан махфий маълумотларни, уларга бериш мумкин эмаслигини била туриб, улашганликда айбланмоқда. Бу билан у АҚШ қонунларини бузган ва миллий хавфсизликни таҳдид остига қўйган”, — деди бош прокурор Меррик Гарланд.
Ҳар бир бандда 10 йилгача озодликдан маҳрум қилиш, уч йилгача шартли равишда озод қилиш ва 250 минг долларгача жарима кўзда тутилган.
Тейшейра 13 апрель куни АҚШ махфий ҳужжатларини эълон қилишда гумонланиб ҳибсга олинган эди. Йигит ишлаган АҚШ ҳарбий-ҳаво кучлари бўлими тергов давомида разведка ишларини тўхтатди.
Май ойида The Washington Post газетаси Тейшейра чет эл фуқароларига махфий маълумотларни узатган бўлиши мумкинлигини ёзди. WP мақоласида айтилишича, Тейшейра махфий ҳужжатларни Украинада уруш бошланганидан бери дўстлари билан бўлишиб келган. Йигит жами нечта ҳужжатни тарқатгани номаълум. Reuters 50 дан ортиқ махфий ҳужжатларни ўрганган, бироқ уларнинг умумий сони юздан ортиқ бўлиши мумкинлигини тахмин қилмоқда.
Изоҳ (0)