O‘zLiDePdan prezidentlikka nomzod Shavkat Mirziyoyev 16-iyun kuni namanganlik saylovchilar bilan uchrashuvda ta’limga oid rejalari haqida to‘xtaldi.
Unga ko‘ra, 2030-yilga qadar Namanganning birorta mahallasida bog‘cha muammosi qolmaydi. Buning uchun, 235 ta yangi bog‘cha quriladi va ta’mirlanadi, 1 mingdan ortiq xususiy bog‘cha tashkil qilinadi.
“Biz kelgusi yetti yilda qo‘shimcha 100 ming yangi o‘quvchi o‘rni yaratamiz. Bunda, 28 ta yangi maktab va 232 ta maktab uchun qo‘shimcha bino quriladi, 268 tasi ta’mirlanadi. Natijada Namangandagi maktablarda 30 nafardan ortiq bola o‘qiydigan sinflar umuman bo‘lmaydi. Viloyatdagi 11 ta maktab xalqaro standartlar asosida ixtisoslashgan maktabga aylantiriladi”, — dedi nomzod.
Bundan tashqari, viloyatda uy-joylar qurish hajmi ham oshiriladi. Shavkat Mirziyoyevning ma’lum qilishicha, kelgusi 7 yilda Namanganda uy-joylar qurish hajmi kamida 10-marta oshiriladi.
Xususan, uy-joy sharoitini yaxshilashga muhtoj 34 ming oila o‘z boshpanasiga ega bo‘ladi. Buning uchun 1 208 ta ko‘p qavatli uy quriladi. Bundan tashqari, Davlatobod tumanida 50 ming xonadonga ega 721 ta ko‘p qavatli turar-joy majmuasi barpo etiladi.
“Bundan tashqari, 3 ming 700 kilometr suv tarmoqlari va 371 ta suv inshooti barpo etiladi va taʼmirlanadi. Bu orqali 123 ta mahallaga (360 ming aholi) ilk bor ichimlik suvi olib kelinadi. Natijada 2030-yilga borib viloyat aholisining toza ichimlik suvi bilan taʼminlanish darajasi 90 foizga yetkaziladi (hozir – 80 foiz)” — dedi Shavkat Mirziyoyev.
Izoh (0)