O‘zLiDePdan prezidentlikka nomzod Shavkat Mirziyoyev 16-iyun kuni namanganlik saylovchilar bilan uchrashuvda O‘zbekistonda aholini o‘qitib, ularni ish bilan ta’minlagan tadbirkorlarga qo‘shimcha imtiyozlar berilishini aytdi.
Bunday tadbirkorlarni rag‘batlantirish uchun 2030-yilga qadar yana 6 milliard dollar mablag‘ ajratiladi.
Bu dastur doirasida, qiymati 50 milliard so‘mdan yuqori loyiha tashabbuskorlariga infratuzilma xarajatlari to‘liq qoplab beriladi (hozir – 200 milliard so‘m).
Shuningdek, ushbu tadbirkorlar:
- kamida 20 foiz kambag‘al oila a’zosini bir yil davomida ish bilan ta’minlaganda mol-mulk va yer soliqlaridan ozod qilinadi;
- “Ijtimoiy reyestr”ga kiritilgan fuqarolarni ishga qabul qilsa, ijtimoiy soliq stavkasi 2 baravarga kamaytiriladi;
- barcha soliqlarni bir yilgacha kechiktirib to‘lashlari mumkin bo‘ladi;
- faoliyatiga doir soliq tekshiruvlari o‘tkazilmaydi.
Shavkat Mirziyoyev, shuningdek, kelgusi yillarda biznes uchun qo‘shilgan qiymat, foyda, aylanma va mol-mulk soliq stavkalari oshirilmasligi qatʼiy kafolatlanishini aytdi.
“Bundan buyon ham, tadbirkorlar o‘z faoliyatini dadil kengaytirishi uchun biznesga noqonuniy aralashuvlarga to‘liq barham berish va soliq tizimini yanada soddalashtirish islohotlarimizning asosiy tamoyili bo‘lib qoladi”, — dedi nomzod namanganlik saylovchilar bilan uchrashuvda.
Biznesga noqonuniy aralashgan, tadbirkorning mulkiga daxl qilgan shaxsga jazo muqarrar bo‘ladi, rahbari esa ishdan ketadi.
Shuningdek:
- qo‘shilgan qiymat solig‘ini qaytarish shartlari 15 tadan 5 taga qisqartiriladi;
- 107 ta davlat xizmati bo‘yicha to‘lovlar miqdori 2 baravar qisqartiriladi;
- 10 million so‘mdan yuqori soliq sanksiyalari faqat sud tartibida amalga oshiriladi.
Izoh (0)