ЎзЛиДеПдан президентликка номзод Шавкат Мирзиёев 16 июнь куни наманганлик сайловчилар билан учрашувда таълимга оид режалари ҳақида тўхталди.
Унга кўра, 2030 йилга қадар Наманганнинг бирорта маҳалласида боғча муаммоси қолмайди. Бунинг учун, 235 та янги боғча қурилади ва таъмирланади, 1 мингдан ортиқ хусусий боғча ташкил қилинади.
“Биз келгуси етти йилда қўшимча 100 минг янги ўқувчи ўрни яратамиз. Бунда, 28 та янги мактаб ва 232 та мактаб учун қўшимча бино қурилади, 268 таси таъмирланади. Натижада Намангандаги мактабларда 30 нафардан ортиқ бола ўқийдиган синфлар умуман бўлмайди. Вилоятдаги 11 та мактаб халқаро стандартлар асосида ихтисослашган мактабга айлантирилади”, — деди номзод.
Бундан ташқари, вилоятда уй-жойлар қуриш ҳажми ҳам оширилади. Шавкат Мирзиёевнинг маълум қилишича, келгуси 7 йилда Наманганда уй-жойлар қуриш ҳажми камида 10 марта оширилади.
Хусусан, уй-жой шароитини яхшилашга муҳтож 34 минг оила ўз бошпанасига эга бўлади. Бунинг учун 1 208 та кўп қаватли уй қурилади. Бундан ташқари, Давлатобод туманида 50 минг хонадонга эга 721 та кўп қаватли турар-жой мажмуаси барпо этилади.
“Бундан ташқари, 3 минг 700 километр сув тармоқлари ва 371 та сув иншооти барпо этилади ва таъмирланади. Бу орқали 123 та маҳаллага (360 минг аҳоли) илк бор ичимлик суви олиб келинади. Натижада 2030 йилга бориб вилоят аҳолисининг тоза ичимлик суви билан таъминланиш даражаси 90 фоизга етказилади (ҳозир – 80 фоиз)” — деди Шавкат Мирзиёев.
Изоҳ (0)