Qoraqalpog‘istonda o‘ziga aloqasi bo‘lmagan fermer xo‘jaliklariga tegishli 620 gektar yerni mansabdor tanishlari orqali 400 ming dollarga rasmiylashtirib bermoqchi bo‘lgan fermer xo‘jalik rahbari ushlandi. Bu haqda O‘zA xabar berdi.
Ma’lum qilinishicha, u oldindan 200 ming dollarni o‘z qarindoshi orqali olgan vaqtida DXXning Xorazm viloyati bo‘yicha boshqarmasi va Iqtisodiy jinoyatlarga qarshi kurashish departamentining hududiy boshqarmasi xodimlari tomonidan ashyoviy dalillar bilan ushlangan.
DXXning Samarqand viloyati bo‘yicha boshqarmasi xodimlari tomonidan Bosh prokuratura huzuridagi departamentning hududiy boshqarmasi xodimlari bilan hamkorlikda o‘tkazilgan tezkor tadbirda Oqdaryo tumanidagi fermer xo‘jalik rahbari mazkur xo‘jalikning 1,5 gektar yer maydonini issiqxona tashkil qilmoqchi bo‘lgan fuqaroga 120 ming dollarga sotishga kelishib, oldindan 60 ming dollar olgan vaqtida ushlangan.
Boshqa holatda esa “Urgut Savdo Kompleksi” MCHJda ishlovchi shaxs o‘zganing ishonchiga kirib, unga mazkur savdo kompleksi hududidan 60 kvadrat metr yer maydoni olib berish uchun 40 ming dollar talab qilib, oldindan 30 ming dollar olgan vaqtida ushlangan.
Namangan viloyat kichik sanoat zonalarini boshqarish va muvofiqlashtirish direksiyasining tumanlardan biridagi mas’ul xodimi o‘zi faoliyat yurituvchi tumanda joylashgan kichik sanoat zonasi hududidan 80 sotix yer maydoni olib berish uchun tadbirkorlik bilan shug‘ullanmoqchi bo‘lgan fuqarodan 300 million so‘m olgan vaqtida DXX xodimlari tomonidan ushlangan.
Qayd etilishicha, hozirda barcha holatlar yuzasidan mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Izoh (0)