“O‘zbekistonlik” loyihasi bilan ko‘plab yoshlar orasida mashhurlikka erishgan Uzbekistan’s club loyihasi Adliya vazirligi tomonidan nodavlat notijorat tashkilot sifatida ro‘yxatdan o‘tganini e’lon qildi.
Uzbekistan’s club – xalqaro miqyosda muvaffaqiyat qozonib kelayotgan o‘zbekistonliklarni bir yerga jamlash maqsadida yaratilgan global platforma bo‘lib, sifatli kontent orqali yoshlarga motivatsiya ulashishni o‘z oldiga maqsad qilgan loyiha hisoblanadi. Tashkilot xorijdagi o‘zbekistonliklar bilan aloqa o‘rnatish, dunyo bo‘ylab turli sohalarda muvaffaqiyatga erishgan o‘zbekistonliklar haqida eksklyuziv loyihalarni tayyorlash va ular bilan doimiy aloqada bo‘lib turish imkonini beruvchi muloqot platformasini kabi ko‘plab loyihalarni boshlagan va hozirgi kunda muvaffaqiyatli tarzda davom ettirib kelmoqda.
“O‘zbekistonlik” loyihasining Fransiyadagi forumda taqdim etilgan epizodida Shell’da IT-arxitektor sifatida faoliyat yuritayotgan Madina Berdiyeva va Strasburg filarmonik orkestrining musiqiy va badiiy rahbari Aziz Shohakimov hikoyasiga e’tibor qaratildi.
Germaniyada taqdim etilgan “O'zbekistonlik” loyihasining navbatdagi sonida muxlislar milliarder Ilon Maskka tegishli SpaceX va Tesla kompaniyalarida faoliyat yuritayotgan o‘zbekistonliklar hikoyasi bilan tanishishdi.
Uzbekistan’s club nodavlat notijorat tashkilot maqomiga ega bo‘lgach, o‘z oldiga qo‘ygan maqsadlarini yanada kengaytirganini ma’lum qildi.
Endilikda tashkilot o‘z oldiga yuqori maqsadlarni qo‘ydi, jumladan:
- xorijdagi o‘zbekistonliklar bilan aloqa o‘rnatish;
- dunyo bo‘ylab turli sohalarda muvaffaqiyatga erishgan o‘zbekistonliklar haqida eksklyuziv va yuqori sifatli audiovizual kontent yaratish;
- jahon hamjamiyati vakillarini buyuk ajdodlarimizning boy madaniy merosi va dunyo tamadduniga qo‘shgan hissasi haqidagi ma’lumotlar bilan tanishtirib borish maqsadida xizmat qiluvchi maydon yaratish.
Tashkilotning rasmiy saytida barcha loyihalar va yaqin kelajakdagi rejalar bilan batafsil tanishish mumkin.
Izoh (0)