Futbol bo‘yicha Markaziy Osiyo assotsiatsiyasi (CAFA) tomonidan o‘tkazilayotgan musobaqada O‘zbekiston va Ummon terma jamoalari “Bunyodkor” stadionida o‘zaro to‘qnash keldi (3:0).
Uchrashuv vaqtida “Bunyodkor” stadioni ekranlarida bukmekerlik kompaniyasi reklama qilingan.
O‘zbekiston Respublikasining Reklama to‘g‘risidagi qonun 46-moddasiga ko‘ra “Qimor o‘yinlari va tavakkalchilikka asoslangan boshqa o‘yinlar, shu jumladan telekommunikatsiya tarmoqlaridan, shuningdek Internet jahon axborot tarmog‘idan foydalangan holda tashkil etiladigan qimor o‘yinlari va tavakkalchilikka asoslangan boshqa o‘yinlar reklamasiga yo‘l qo‘yilmaydi”.
“Daryo” ushbu masala yuzasidan izoh so‘rab, O‘FA matbuot xizmati bilan bog‘landi.
O‘FAning bu reklamaga hech qanday aloqasi yo‘q. Bu xalqaro musobaqa. O‘zbekiston uning ishtirokchisi hisoblanadi. Reklama beruvchilar turnir tashkilotchilari bilan kelishuv imzolaydi. Media va marketingga oid barcha huquqlar CAFA’ga tegishli. Shu bois savollar CAFA’ga qaratilishi lozim, — deyiladi O‘FA javobida.
Markaziy Osiyo assotsiatsiyasi avvalroq 1xBet kompaniyasi CAFA Nations Cup musobaqasining bosh homiysiga aylanishi haqida ma’lum qilgandi.
Ma’lumot uchun, 7-aprel kuni prezident Shavkat Mirziyoyev “Ommaviy va professional futbolni har tomonlama rivojlantirishning qo‘shimcha chora-tadbirlari to‘g‘risida”gi qarorni imzolagan va unda qator mutasaddilar bir birgalikda maxsus ishchi guruhni tashkil qilgan holda 2023-yil yakuniga qadar ilg‘or xorij tajribasi asosida futbolni moliyalashtirish tizimini kengaytirishda bukmekerlik faoliyatini amalga oshirish bo‘yicha takliflarni Vazirlar Mahkamasiga kiritishi belgilangandi.
Yanvar oyida Niderlandiya sudi mijozlariga pulni to‘lamagani uchun 1xBet kompaniyasini bankrot deb e’lon qilgandi.
1xBet kompaniyasi 2007-yilda Kiprda tashkil etilgan. Kompaniyaning daromadi so‘nggi mavjud ma’lumotlarga ko‘ra, 2 milliard dollarni tashkil qiladi. Ofshor hisob raqamlar va boshqa savol tug‘diradigan holatlar sabab kompaniya qator mamlakatlar tomonidan “qora ro‘yxat”ga kiritilgan.