Samarqandda 4-qavatdan tushib ketgan qizni qutqarib qolgan yigitlar yana taqdirlandi

Samarqandda to‘rt nafar yigit ko‘p qavatli uyning derazasidan tushib ketgan qizchaning hayotini saqlab qolgandi. Viloyat Favqulodda vaziyatlar boshqarmasi boshlig‘i ular bilan uchrashib, esdalik sovg‘alari bilan taqdirladi.

Xabar berilishicha, boshqarma boshlig‘i Ilhom Ismoilov yoshlar bilan uchrashib, favqulodda vaziyatlar vazirining faxriy yorlig‘i va minnatdorchiligini yetkazdi. Shuningdek, esdalik sovg‘alari — televizorlar bilan taqdirladi.

1-iyun kuni Samarqanddagi maktablardan birining 11-sinfini bitirayotgan ushbu yigitlar sayr qilib yurishganda ko‘p qavatli uyning 4-qavatida boshi panjara orasiga tiqilib, tanasi havoda osilib turgan kichkina qizchani ko‘rib qolgandi.

O‘quvchilardan biri darhol qizaloqning ota-onasiga xabar berish uchun kvartira tomon yugurgan. Qolganlari qizaloq osilib qolgan balkon ostida uni tutib qolish uchun qo‘llarini uzatib turgan. Yigitlardan biri zinapoyadan yugurib chiqayotgan paytda, qizaloq pastga tushib ketgan. Yigitlar uni tutib olgan va qizcha omon qolgan.

Ularning u harakati uchun viloyat Maktabgacha va maktab ta‘limi boshqarmasi rahbari ham tashakkurnoma va noutbuklar bilan taqdirlagandi.