AQSHning O‘zbekistondagi elchisi Jonatan Xenik “Daryo”ga bergan intervyusida Rossiya agressiyasini qo‘llab-quvvatlagani uchun sanksiyalar ro‘yxatiga O‘zbekiston ham kiritilganiga munosabat bildirdi.

“Men Rossiya tajovuzini qoralamoqchiman. Agar Rossiya Federatsiyasi o‘zining tinch qo‘shnisiga qarshi harbiy hujum uyushtirmaganida, biz bunday vaziyatga tushib qolmagan bo‘lardik.

Zo‘ravonlik, hududni egallab olish, minglab askarlar va tinch aholini o‘ldirish... AQSH boshqa davlatlar bilan hamkorlikda chora-tadbirlar ko‘rishi, iqtisodiy sanksiyalar qo‘llashi, Rossiyani tajovuzi uchun jazolashga harakat qilishiga to‘g‘ri kelganidan afsusdaman, albatta.

Ushbu chora-tadbirlar Rossiyaning harbiy mashinasini qayta jihozlash va qayta qurollantirishga yo‘l qo‘ymaslik uchun mo‘ljallangan. Ular rus xalqiga zarar yetkazish uchun mo‘ljallanmagan.

Ular boshqa davlatga, xususan, O‘zbekistonga zarar yetkazishga qaratilmagan. AQSH davlat kotibi Entoni Blinkin shu yerda bo‘lganida vazirlar va Shavkat Mirziyoyevning o‘zi bilan gaplashib, bu sanksiyalar zarar keltirishga qaratilmaganini aytib o‘tgandi.

Biz bu sanksiyalar O‘zbekistonning iqtisodiy imkoniyatlari va sohalariga zarar yetkazmasligi uchun qo‘limizdan kelgan hamma ishni qilamiz. O‘zbekiston hukumati biz bilan hamkorlikda ishlashga tayyor ekanidan juda mamnunmiz”, — dedi Jonatan Xenik.