Portugaliyalik mutaxassis Paulu Bentu O‘zbekiston milliy terma jamoasiga bosh murabbiy etib tayinlanishi mumkin. Bu haqda Championat.asia nashri xabar bermoqda.
Manbaga ko‘ra, ayni paytda O‘zbekiston futbol assotsiatsiyasi murabbiyning vakillari bilan muzokaralar olib bormoqda. Bentuning so‘nggi ish joyi Birlashgan Arab Amirliklari (BAA) terma jamoasi bo‘lgan. U jamoani Jahon chempionati yo‘llanmasiga olib chiqa olmagach, iste’foga chiqarilgandi.
Paulu Bentu murabbiylik faoliyati davomida Portugaliyaning “Sporting”, Braziliyaning “Kruzeyro”, Gretsiyaning “Olimpiakos” va Xitoyning “Chunsin Lifan” klublarida ishlagan. Shuningdek, u Portugaliya, Janubiy Koreya va BAA terma jamoalarini boshqargan.
U ikki marta Jahon chempionatida qatnashgan: 2014-yilda Braziliyada Portugaliya terma jamoasini boshqargan va guruh bosqichida musobaqani tark etgan. 2022-yil Qatarda o‘tgan mundialda Janubiy Koreya terma jamoasi bilan pley-off bosqichiga chiqqan, ammo 1/8 finalda Braziliyaga 1:4 hisobida yutqazgan.
Ma’lumot o‘rnida, hozirda O‘zbekiston terma jamoasini Timur Kapadze boshqarmoqda. Uning qo‘l ostida jamoa tarixda ilk bor Jahon chempionati yo‘llanmasini qo‘lga kiritdi.
Izoh (0)