“O‘tgan 2 yil mobaynida tergov paytida IIB binolaridan o‘lik chiqmagan” — ichki ishlar vaziri o‘rinbosari

Ichki ishlar vaziri o‘rinbosari, Tergov departamenti boshlig‘i Ramazon Ashropov 2024—2025-yillarda Ichki ishlar vazirligining quyi bo‘g‘inlaridagi viloyat, tuman va shahar IIB binolaridan birorta o‘lik chiqmaganini ma’lum qildi. Bu haqda u 19-avgust kuni vazirlikda tashkil etilgan matbuot anjumanida gapirdi. 

Tergovda o‘lik chiqmagan. Dastlabki tergov, Ichki ishlar idoralarining tergov departamenti va uning quyi tizimlari xodimlari tergov qilayotgan jinoyat ishlari bo‘yicha birorta o‘lik chiqmadi. Men oldingi yillarni emas, mana shu o‘zim ishlayotgan yillar 2024—2025-yillarni nazarda tutyapman, deydi vazir o‘rinbosari Ramazon Ashropov. 

Vazir o‘rinbosari 2023-yilda Toshkent viloyatining Yuqori Chirchiq tumanida Qozog‘iston fuqarosining o‘limi yuz berganini yodga olar ekan, u kasalligi sabab vafot etganini ta’kidladi. 

Yuqori Chirchiqda 2023-yil Qozog‘iston fuqarosi bilan shunday holat bo‘ldi. O‘sha yerda koridorda kameralarimiz bor, hammasi ko‘rinib turibdi. Yuragi yomon bo‘lib, o‘zining kasalligi sabab vafot etgani holati bor. Bu ekspertiza xulosalari, o‘sha videosyomka va guvohlarning ko‘rsatmasi bilan prokuratura idoralari tomonidan holatga huquqiy baho berilgan va jinoyat yo‘qligi alohida ta’kidlab o‘tilgan, dedi mas’ul. 

Ramazon Ashropov jurnalistlarning tergov xonalari qay darajada kameralashtirilgan degan savoliga ham javob qaytardi. 

“Men sizga kafolat bera olaman, bugungi kungacha muhtaram prezidentimizning topshiriqlariga binoan tergov xonalari 100 foiz kameralashtirilgan va bir necha yillardan beri ishlayapti”, dedi vazir o‘rinbosari 

Vazir o‘rinbosariga ko‘ra, tergovga qadar tekshiruv o‘tkazadigan har bir IIB xodimi maxsus so‘roqxonada so‘rov o‘tkazishi shart. 

U profilaktika xodimi bo‘ladimi, jinoyat qidiruv xodimimi, yoki ko‘chada xizmat olib boradigan patrul-post xizmat xodimi yoinki harakat xavfsizligi xizmati xodimi bo‘ladimi olib kelgan har bir fuqaroni so‘roqxonaga o‘tkazib, so‘rov — so‘roq emas, so‘rov o‘tkazish shart. Bu O‘zbekiston Respublikasi Ichki ishlar vazirligining 101-buyrug‘i bilan qat’iy belgilab qo‘yilgan. Faqat shu xonada so‘rov o‘tkazilishi kerak, deydi vazir o‘rinbosari.

2020-yil yanvar oyida Qashqadaryo viloyatining Chiroqchi tumanida, iyun oyida esa Andijon viloyatining Andijon shahridagi IIB binolarida birin-ketin o‘liklar chiqdi. Voqealar ortidan yuzaga chiqqan savollarga javob qaytarish uchun Qarshi shahridagi matbuot anjumanida ko‘rinish bergan vazirlik axborot xizmati rahbari Shohrux G‘iyosov jamoatchilikka IIB binolaridan odam o‘ligining chiqishi yangilik emas degan iborani ishlatgan. Masʼulning bu gapi jamoatchilikni o‘sha paytda qanchalik hayratlantirgan bo‘lsa, shuning barobarida ko‘pchilikning g‘azabiga ham sabab bo‘lgan.

Andijondagi IIB binosida jon bergan Alijon Abdukarimov besh yil avvalgi qimmatbaho tosh mojarosi sabab IIBga tergov qilish uchun olib borilgan bo‘lsa, Chiroqchi tuman IIBdan o‘lik holda chiqqan Yusuf Abdurahmonov mol o‘g‘riligida gumonlanib, so‘roq qilingandi. Har ikkisi ham IIB xodimlarining zo‘ravonligi, so‘roq qilinayotgan gumonlanuvchiga nisbatan kuch ishlatishi ortidan vafot etgan.

“Chiroqchi voqeasi” aybdorlari ishini ko‘rib chiqqan Oliy sud sudyasi Kamoliddin Tolliboyev raisligidagi sudlov hayʼati marhum Yusuf Abdurahmonov o‘limida ayblanganlar — Chiroqchi tumani IIO FMB 4-sonli IIB boshlig‘i lavozimida ishlagan Nurbek Ovlayevni 9 yilga, jinoyat qidiruv guruhi tezkor vakili lavozimida ishlagan Anvar Jonqobilovni 8 yil 6 oyga, 4-sonli IIB profilaktika inspektori lavozimida ishlagan Sherzod Rahmonovni 6 yilga, Adham Tojinorovni 5 yil 6 oyga ozodlikdan mahrum qilingandi. Chiroqchi tumani IIO FMB 4-sonli IIB jinoyat qidiruv guruhi tezkor vakili lavozimida ishlagan Boburmirzo G‘ayratovga esa 2 yil IIBda hamda boshqa mansabdorlik vazifalarida ishlash huquqidan mahrum qilinib, 4 yil ozodlikni cheklash jazosi tayinlangandi.

Andijonlik fuqaro o‘limiga sababchi bo‘lganlar ham jazosiz qolmadi, albatta. 2020-yil 27-noyabr kuni Jinoyat ishlari bo‘yicha Andijon viloyat sudi binosida sudlanuvchilar D.Hamraliyev 9 yilga, Qodirov, Rayimjonov va Hasanboyevlar 10 yilga, P.Mamajonov 8 yil 6 oyga, A.To‘raqulov 1 yil muddatga ozodlikdan mahrum qilindi.