“O‘zgidromet” yozning birinchi oyida qanday ob-havo kutilayotgani haqida ma’lumot berdi.
So‘nggi vaqtlarda aholi orasida 2023-yilgi yoz fasli ham anomal (g‘ayritabiiy) issiq, barcha kuzatuv yillari uchun eng issiq bo‘ladi degan maʼlumotlar paydo bo‘ldi, hudud uchun umuman to‘g‘ri kelmaydigan harorat qiymatlari aytildi. “O‘zgidromet”ga ko‘ra, bunday maʼlumotlar, odatda, hech qanday ilmiy asosga ega emas. Meteorologiya fani bir vaqtning o‘zida bir necha oy oldin harorat fonini prognoz qila olmaydi.
Mutaxassislarga ko‘ra, bugungi kunda yuqori aniqlik bilan faqat iyun — yozning birinchi oyi haqida gapirish mumkin. 2023-yilning iyuni o‘rtacha issiq ob-havo bilan boshlanadi. Oyning eng boshida havo harorati 34-37 daraja atrofida bo‘ladi. Ikkinchi besh kunlikda issiq 37-40 darajagacha, janubda va cho‘l hududlarda 40-43 darajagacha ko‘tariladi va bunday harorat ikkinchi o‘n kunlikning boshigacha saqlanib turadi.
Birinchi o‘n kunlik davomida O‘zbekiston hududining katta qismida quruq ob-havo bo‘lishi kutilmoqda, faqat tog‘li hududlarda ayrim kunlarda mahalliy momaqaldiroqli yomg‘irlar yog‘ishi mumkin.
Iyun oyining ikkinchi va uchinchi o‘n kunliklarida issiq qisqa muddatga biroz kuchsizlanish davrlari bilan harorat, asosan, 36-39 daraja, respublika shimolida, janubida va cho‘l hududlarida 42 daraja atrofida bo‘ladi.
Umuman olganda, iyun oyi harorat meʼyordan 2-3 daraja yuqoriroq bo‘ladi. Ayrim kunlarda baʼzi joylarda biroz qisqa muddatli yomg‘ir yog‘ishi mumkin. Ushbu oyda yog‘ingarchilik miqdori meʼyordan kam bo‘lishi kutilmoqda.
“Iyul va avgust oylari uchun ob-havo prognozlari faqat ehtimollik shaklida tuzilishi mumkin — bu uzoq muddatli prognozlarga eng to‘g‘ri va aniq yondashuvdir. Iyul va avgust oylarida 60-70 foiz ehtimollik bilan harorat foni meʼyordan biroz yuqori va uning atrofida bo‘lishi kutilmoqda.
Yozda anomal issiq bo‘lmaydi, biroq haroratni 40-42 darajagacha, respublikaning shimoliy, janubiy va cho‘l hududlarida 43-45 darajagacha ko‘tarilib, juda issiq ob-havoning ayrim davrlari ham istisno qilinmaydi. Bu O‘rta Osiyo iqlimining xususiyatlaridan biridir”, — deyiladi “O‘zgidromet” xabarida.
Izoh (0)