Shavkat Mirziyoyev tadbirkorlar bilan uchrashuvda eng ko‘p qaysi so‘zlarni ishlatdi?

Shavkat Mirziyoyev 2025-yil 20-avgust kuni Yangi Toshkentda o‘tkazilgan tadbirkorlar bilan beshinchi ochiq muloqotdagi nutqida “tadbirkor”, “biznes”, “korxona”, “soliq” kabi so‘zlarni eng ko‘p tilga oldi. Iqtisodiy tadqiqotlar va islohotlar markazi mutaxassislari prezidentning tadbirkorlar bilan muloqoti chog‘ida nutqini lingvistik tahlil qildi.

Davlat rahbari o‘z nutqida jami 4 241 so‘zdan foydalangan. Eng ko‘p “tadbirkor” — 107 marta, “biznes” — 34 marta, “korxona” — 29 marta, “soliq” — 21 marta, “investitsiya”, “loyiha”, “kredit” — 15 marta, “tizim” — 14 marta, “sharoit”, “bank”, “startap” — 13 marta va “eksport” so‘zi — 12 marta tilga olingan.

Bir qator asosiy iboralarga alohida e’tibor qaratildi, “biznes vakillari” — 8 marta, “ochiq muloqot” — 7 marta, “imtiyozli kredit” — 4 marta takrorlangan. Shuningdek, nutqda “Yangi O‘zbekiston”, “kichik biznes”, “yosh tadbirkor”, “yakka tadbirkor”, “moliyaviy xizmatlar”, “aylanma mablag‘” va “eng ilg‘or” kabi iboralar har biri 3 martadan tilga olingan.

Uch so‘zdan iborat iboralardan “yakka tartibdagi tadbirkor” va “kuch — bu tadbirkorlar” iboralarining har biri 3 marta qayd etilgan. Shuningdek, nutqda “aholi va tadbirkorlar”, “litsenziya va ruxsatnoma”, “bog‘cha va maktab”, “kichik biznes uchun”, “imtiyozli kredit ajratiladi”, “qo‘llab-quvvatlashga tayyorman”, “qarzdorlik uchun jarima”, “band qilgan shaxs” va “oilaviy mehmon uylari” iboralarining har biri 2 martadan tilga olingan.

Shu tariqa, nutqdan ko‘rinadiki, prezident tadbirkorlarni islohotlarning asosiy kuchiga aylantirishga e’tibor qaratdi hamda soliq, kredit, investitsiya, biznes yuritish sharoitlari va eksportni rivojlantirish kabi muhim masalalarni ham alohida ta’kidladi.

“Bu so‘zlarning ko‘p takrorlanishi nutqda asosiy e’tibor tadbirkorlikni qo‘llab-quvvatlash, investitsiya va kredit mexanizmlarini kengaytirish, soliq yukini yengillashtirish hamda eksport salohiyatini oshirishga qaratilganini ko‘rsatadi”, deyiladi tahlilda.

So‘nggi to‘rt yilda qilingan lingvistik tahlillar

O‘tgan to‘rt yil ichida prezidentning tadbirkorlar bilan bo‘lgan muloqotlarida ishlatgan so‘zlari muayyan tendensiyalarni ko‘rsatdi. “Tadbirkor” so‘zi eng ko‘p takrorlangan bo‘lib, bu tadbirkorlar davlat siyosatida markaziy o‘rin egallaganini ko‘rsatadi. “Soliq” so‘zi 2023-yili ancha ko‘p ishlatilgan, keyingi yillarda esa kamaygan, bu esa soliq ma’murchiligini bosqichma-bosqich isloh qilish va tadbirkorlar uchun imtiyozli shart-sharoitlar yaratilayotganini ko‘rsatadi.  

“Kredit” va “investitsiya” so‘zlari doimiy ravishda ishlatilib, moliyalashtirish va sarmoya jalb qilish siyosatining uzluksizligini ta’kidlaydi. “Xizmat” so‘zi 2024-yili 3-4 baravar ko‘paygan va 2025-yili ham e’tibor markazida bo‘lgan. Bu mamlakatda xizmat ko‘rsatish sohasiga e’tibor kuchayganini, turizm, ta’lim va tibbiyot kabi xizmat yo‘nalishlari iqtisodiy siyosatning muhim drayveriga aylanganini ko‘rsatadi.

2025-yilda “startap” so‘zining ishlatilishi keskin ortdi. Bu holat davlat tomonidan innovatsiyalar, raqamli iqtisodiyot va yoshlar tashabbuslariga strategik yo‘nalish sifatida katta e’tibor qaratilayotganini ko‘rsatadi. Shuningdek, so‘nggi yillarda “infratuzilma” va “sharoit” kabi atamalar ham ko‘proq tilga olingan. Bu biznes muhitini yaxshilash va qulay shart-sharoitlar yaratishning doimiy vazifa ekanini anglatadi.

So‘nggi to‘rt yillik tahlil davlat rahbarining chiqishlaridagi asosiy e’tibor bosqichma-bosqich soliq va kredit siyosati masalalaridan xizmat ko‘rsatish sohasi, startaplar hamda infratuzilmani rivojlantirish masalalariga o‘ta boshlaganini ko‘rsatdi. 

So‘zlarni yo‘nalishlar bo‘yicha taqsimoti prezident eng katta e’tiborni huquqiy muhit va investitsiyaviy iqlim masalalariga (21 foiz), shuningdek, startaplarni moliyalashtirish va qo‘llab-quvvatlashga (17 foiz) qaratganini ko‘rsatdi.