Қашқадарё вилоятида ўйинчоқ пистолетни машина ойнасидан чиқариб, йўл ҳаракати қоидаларини бузган ҳолда ҳаракатланган ҳайдовчи жавобгарликка тортилди. Бу ҳақда вилоят ИИБ ахборот хизмати хабар берди.
Қайд этилишича, Шаҳрисабз тумани “Келдиҳаёт” маҳалласида яшовчи фуқаро автомашинасида йўлнинг қатнов қисмида илонизи бўлиб ҳаракатланиб, атрофдагилар эътиборини ўзига тортган. Шунингдек, ҳайдовчи ёнидаги ўйинчоқ пистолетни машина ойнасидан чиқариб, намойишкорона ҳаракат қилган.
Ҳолат юзасидан олиб борилган суриштирувлар давомида қоидабузар ҳайдовчи Маъмурий жавобгарлик тўғрисидаги кодекснинг 125-модда (транспорт воситаларидан фойдаланиш қоидаларини бузиш) 3-қисми, 128-модда (ҳайдовчиларнинг транспорт воситаларини пиёдалар йўлкаларидан юргизиши, йўл белгилари ва йўл ҳаракатининг бошқа қоидалари талабларига риоя этмаслиги) 3-қисми ва 183-моддасида (майда безорилик) назарда тутилган ҳуқуқбузарликни содир этган.
“Машиналар менга йўл бермагани учун уларни қувиб ўтдим ва ўйинчоқ пистолетни чиқариб кетдим… Шунчаки, қизиқиш учун қилдим… Қилган ишимдан афсусдаман”, — дейди ҳайдовчи.
Ҳолат жиноят ишлари бўйича Шаҳрисабз туман судида кўриб чиқилиб, ҳайдовчига нисбатан 5 сутка маъмурий қамоқ жазоси тайинланди.
2022 йил апрелда Бухоро шаҳри 39-сон ихтисослаштирилган мактаб ўқувчиси ёнидан тўппонча топилганди. Шу йилнинг март ойида эса Ўзбекистон ҳудудига Россиядан ноқонуний қурол олиб ўтиш билан боғлиқ ҳолатларга чек қўйилган эди.
Изоҳ (0)