Тошкент шаҳри Юнусобод туманидаги вакцина ва зардоблар илмий-тадқиқот институти ҳудудида қурилиш бўлаётгани ва ҳудуд аҳолиси бундан норози экани ҳақида мурожаат эълон қилинди. Фармацевтика тармоғини ривожлантириш агентлиги ҳолатга муносабат билдирди.
Қайд этилишича, Тошкент вакцина ва зардоблар илмий-тадқиқот институти турли юқумли касалликларни ўрганиш, ташхислаш ва уларнинг олдини олиш каби долзарб муаммоларни ўрганувчи йирик илмий марказлардан бири ҳисобланади. Тошкент вакцина ва зардоблар илмий-тадқиқот институти 100 йилдан ортиқ вақт давомида 120 турдаги маҳсулотлар орқали куйдирги, вабо, безгак, қутуриш, сил, қоқшол ва бошқа касалликларга қарши вакцина ишлаб чиқарган.
Президентнинг 2020 йил 25 ноябрдаги “Биотехнологияларни ривожлантириш ва мамлакатнинг биологик хавфсизлигини таъминлаш тизимини такомиллаштириш бўйича комплекс чора-тадбирлар тўғрисида”ги қарорига асосан маҳаллий иммунобиологик препаратлар яратиш, вакцина ва зардоблар ишини ҳамда фармацевтик биотехнологияни ривожлантириш йўлида амалга оширилаётган ишлар қўллаб-қувватланган. Шунингдек, қарорга асосан институтда 13 та лаборатория ташкил этилиб, бугунги кунда ўз фаолиятини давом эттирмоқда.
Агентлик ахборот хизматига кўра, хавфли касалликларнинг қўзғатувчилари узоқ муддат давомида ташқи муҳитда, айниқса қуёш тушмайдиган нам жойларда сақланиб қолади. Институт ҳудудида турли юқумли ва ўта хавфли касалликларга қарши вакциналар ишлаб чиқарилганлигини инобатга олиб, қурилиш ишлари аҳоли саломатлигига қанчалик хавф туғдиришини аниқлаш мақсадида бугунги кунда ўрганиш ишлари олиб борилмоқда. Ўрганиш ишлари якунланганидан сўнг қўшимча маълумот берилади.
Изоҳ (0)