O‘zbek-qozoq chegara o‘tkazish punktlarida shu kunlarda uzun tirbandlik kuzatilmoqda. Bojxona qo‘mitasining ma’lum qilishicha, bu masalani hal etish uchun ikki mamlakat mutasaddi idoralari ishtirokida sayyor uchrashuv bo‘lib o‘tdi.
Ta’kidlanishicha, so‘nggi 5 yilda ikkala davlat o‘rtasidagi do‘stlik, yaxshi qo‘shnichilik va strategik hamkorlik aloqalarining rivojlanishi natijasida aynan avtotransport vositalari orqali tashilayotgan tashqi savdo yuklari ikki barobarga oshgan. Xususan, o‘zbek-qozoq chegarasi orqali harakatlanayotgan yuk avtotransport vositalari soni ham yiliga o‘rtacha 100 mingtaga oshmoqda.
Ayni vaqtda O‘zbekistonda pishiqchilik mavsumi ham boshlangan bo‘lib, noyabr oyiga qadar qishloq xo‘jaligi mahsulotlari eksporti kundan kunga oshadi. Mazkur omillar natijasida o‘zbek-qozoq chegara o‘tkazish punktlarida shu kunlarda jami hisobda mingga yaqin yuk avtotransport vositalarining tirbandligi kuzatilmoqda.
Uchrashuvda muammoni tezkorlik bilan bartaraf etishga qaratilgan takliflar ilgari surildi. Xususan, O‘zbekiston tomoni asosan kunduzgi vaqtda faoliyat yurituvchi “Malik” (O‘zbekiston) — “Sirdaryo” (Qozog‘iston) o‘tkazish punktini sutkalik rejimga o‘tkazish, shuningdek, harakatlanayotgan haydovchilarning fuqaroligi va transport vositasi ro‘yxatdan o‘tkazilgan davlatga doir cheklovlarni bekor qilish taklifini ilgari surmoqda.
Buning uchun ikkala davlat o‘rtasida 2001-yilda imzolangan kelishuvlarga o‘zgartirishlar kiritish loyihasi ham ishlab chiqilgan.
Shuningdek, “Yallama” (O‘zbekiston) — “B.Konisbayev” (Qozog‘iston) chegara-bojxona postlari orqali yuk avtotransport vositalarining o‘tkazuvchanligini sutkasiga 700 tagacha oshirish taklifi ham ilgari surildi. Buning uchun qo‘shimcha kuch va vositalar, xususan, ilg‘or axborot texnologiyalarini keng jalb etish nazarda tutilgan.
Izoh (0)