O‘zbekistonda yuqori instansiya sudi tomonidan sud qarorini bekor qilib, yangidan ko‘rish uchun quyi sudga yuborish amaliyoti tugatilishi kutilmoqda.
23-may kuni Oliy Majlis Qonunchilik palatasining navbatdagi majlisida “Sud qarorlarining qonuniyligi, asosliligi va adolatliligini tekshirish instituti takomillashtirilishi munosabati bilan O‘zbekiston Respublikasining Jinoyat-protsessual kodeksiga o‘zgartirish va qo‘shimchalar kiritish to‘g‘risida”gi qonun loyihasi ikkinchi o‘qishda ko‘rib chiqildi.
Unda Jinoyat-protsessual kodeksiga qonuniy kuchga kirgan sud qarorlarini kassatsiya tartibida ko‘rib chiqish vakolatini viloyat va unga tenglashtirilgan sudlar vakolatiga o‘tkazishga hamda yuqori instansiya sudlari tomonidan sud qarorlarini bekor qilish va ishni yangidan ko‘rish uchun quyi sudga yuborish amaliyotini tugatishga doir protsessual qoidalarni nazarda tutuvchi o‘zgartirish va qo‘shimchalar kiritilmoqda.
Qonunchilik palatasi xabarida ta’kidlanishicha, qonun loyihasining qabul qilinishi sudyalarning mas’uliyatini oshirishga, ishlarning sifatli va o‘z vaqtida ko‘rilishiga, sud qarorlarini qayta ko‘rishda viloyat sudlarining hamda ularga tenglashtirilgan sudlarning imkoniyatlaridan samarali foydalanishga, fuqarolarning shikoyat qilish huquqidan foydalanish imkoniyatlarini kengaytirishga va noroziliklarning oldini olishga hamda ortiqcha sarsongarchiliklarga yo‘l qo‘ymaslikka xizmat qiladi.
Majlisda qonun loyihasi deputatlar tomonidan qabul qilindi.
Ushbu qonun loyihasi 2022-yilning dekabrida birinchi o‘qishda ko‘rib chiqilgandi. O‘shanda Oliy sud raisi o‘rinbosari Shuhrat Polvonov mazkur qonunni qabul qilish zarurati haqida gapirib, “Bir sud – bir instansiya” tamoyili asosida joriy qilingan sud qarorlarini qayta ko‘rish instituti bo‘yicha o‘tkazilgan tahlillar mazkur institutni takomillashtirishni ko‘rsatayotganini qayd etgandi.
“Xususan, sud qarorlarining qonuniyligi, asosliligi va adolatliligini tekshirishda “Bir sud – bir instansiya” tamoyili asosida kassatsiya instansiyasida ishlarni ko‘rish Oliy sud vakolatiga o‘tkazilishi o‘rta bo‘g‘in – viloyat sudlari imkoniyatlaridan samarali foydalanishni cheklamoqda. 2020-yilda Oliy sud tomonidan 1 ming 291 ta ish ko‘rib chiqilgan bo‘lsa, 2021-yilda bu ko‘rsatkich 7 ming 560 taga yetgan. 2022-yilning o‘n oyida esa 5 ming 540 tani tashkil etdi. Ya’ni Oliy sudda ko‘rilgan ishlar soni bir necha barobar oshgan.
Natijada Oliy sudda ish hajmi keskin oshib ketishi bilan birga fuqarolar olis hududlardan ortiqcha vaqt va xarajat sarflab Oliy sudga kelishga majbur bo‘lmoqda. Qolaversa, Oliy sudda ish hajmining ortib ketishi natijasida ayrim hollarda ishlarni ko‘rish muddatlari buzilishiga hamda sudyalarning ish sifatiga ham salbiy ta’sir ko‘rsatmoqda”, — degan edi Oliy sud raisi o‘rinbosari.
Izoh (0)