Ўзбекистонда юқори инстанция суди томонидан суд қарорини бекор қилиб, янгидан кўриш учун қуйи судга юбориш амалиёти тугатилиши кутилмоқда.
23 май куни Олий Мажлис Қонунчилик палатасининг навбатдаги мажлисида “Суд қарорларининг қонунийлиги, асослилиги ва адолатлилигини текшириш институти такомиллаштирилиши муносабати билан Ўзбекистон Республикасининг Жиноят-процессуал кодексига ўзгартириш ва қўшимчалар киритиш тўғрисида”ги қонун лойиҳаси иккинчи ўқишда кўриб чиқилди.
Унда Жиноят-процессуал кодексига қонуний кучга кирган суд қарорларини кассация тартибида кўриб чиқиш ваколатини вилоят ва унга тенглаштирилган судлар ваколатига ўтказишга ҳамда юқори инстанция судлари томонидан суд қарорларини бекор қилиш ва ишни янгидан кўриш учун қуйи судга юбориш амалиётини тугатишга доир процессуал қоидаларни назарда тутувчи ўзгартириш ва қўшимчалар киритилмоқда.
Қонунчилик палатаси хабарида таъкидланишича, қонун лойиҳасининг қабул қилиниши судьяларнинг масъулиятини оширишга, ишларнинг сифатли ва ўз вақтида кўрилишига, суд қарорларини қайта кўришда вилоят судларининг ҳамда уларга тенглаштирилган судларнинг имкониятларидан самарали фойдаланишга, фуқароларнинг шикоят қилиш ҳуқуқидан фойдаланиш имкониятларини кенгайтиришга ва норозиликларнинг олдини олишга ҳамда ортиқча сарсонгарчиликларга йўл қўймасликка хизмат қилади.
Мажлисда қонун лойиҳаси депутатлар томонидан қабул қилинди.
Ушбу қонун лойиҳаси 2022 йилнинг декабрида биринчи ўқишда кўриб чиқилганди. Ўшанда Олий суд раиси ўринбосари Шуҳрат Полвонов мазкур қонунни қабул қилиш зарурати ҳақида гапириб, “Бир суд – бир инстанция” тамойили асосида жорий қилинган суд қарорларини қайта кўриш институти бўйича ўтказилган таҳлиллар мазкур институтни такомиллаштиришни кўрсатаётганини қайд этганди.
“Хусусан, суд қарорларининг қонунийлиги, асослилиги ва адолатлилигини текширишда “Бир суд – бир инстанция” тамойили асосида кассация инстанциясида ишларни кўриш Олий суд ваколатига ўтказилиши ўрта бўғин – вилоят судлари имкониятларидан самарали фойдаланишни чекламоқда. 2020 йилда Олий суд томонидан 1 минг 291 та иш кўриб чиқилган бўлса, 2021 йилда бу кўрсаткич 7 минг 560 тага етган. 2022 йилнинг ўн ойида эса 5 минг 540 тани ташкил этди. Яъни Олий судда кўрилган ишлар сони бир неча баробар ошган.
Натижада Олий судда иш ҳажми кескин ошиб кетиши билан бирга фуқаролар олис ҳудудлардан ортиқча вақт ва харажат сарфлаб Олий судга келишга мажбур бўлмоқда. Қолаверса, Олий судда иш ҳажмининг ортиб кетиши натижасида айрим ҳолларда ишларни кўриш муддатлари бузилишига ҳамда судьяларнинг иш сифатига ҳам салбий таъсир кўрсатмоқда”, — деган эди Олий суд раиси ўринбосари.
Изоҳ (0)