Xitoy Xalq Respublikasida Toshkent viloyati vakolatxonasi tashkil etiladi. Unga tadbirkor Zafarxo‘ja Usmonovni rahbar etib tayinlashga kelishib olingan. Bu haqda viloyat hokimi Zoir Mirzayev boshchiligidagi Toshkent viloyati delegatsiyasining Xitoy Xalq Respublikasiga tashrifi davomida so‘z borgan.
Viloyat hokimligi axborot xizmati rahbari Behzod Qobulovning “Daryo”ga bildirishicha, delegatsiya vakillari dastlab Shinjon-uyg‘ur avtonom rayoniga borib, Urumchi shahridagi “Yuqori texnologiyalar zonasi”ga tashrif buyurgan.
“U yerdagi tibbiyot majmuasini raqamlashtirish jarayonlariga alohida eʼtibor qaratildi. Hokim yangi ish uslublarini yuqori baholadi. Kunning ikkinchi yarmida Toshkent viloyati delegatsiyasi mazkur hududda Kommunistik partiya kotibi Ma Sinrui bilan uchrashdi. Partiya kotibi mehmonlarni Xitoy — Markaziy Osiyo sammiti muvaffaqiyatli o‘tgani bilan tabrikladi. Hokim Xitoy bilan samarali hamkorlik qilish muhimligini taʼkidlab, qurilish, elektrotexnika, qishloq xo‘jaligi, yengil sanoat, charm mahsulotlarini ishlab chiqarish, shuningdek, ishlab chiqarishga raqamli texnologiyalar, muqobil energiya manbalarini joriy etish, quyosh panellarini o‘rnatish, turizm, fan va madaniyat kabi sohalarda hamkorlik qilish taklifini ilgari surdi”, — deydi Behzod Qobulov.
Taʼkidlanishicha, Xitoy tomoni Toshkent viloyatida qurilish materiallari, xususan santexnika buyumlari, chinni ishlab chiqaruvchi tadbirkorlardan iborat yirik delegatsiya shakllantirib, biznes-forum tashkil etish niyati borligini bildirgan. Zoir Mirzayev esa buni qo‘llab-quvvatlagan.
“Viloyat hokimi xitoyliklarga Toshkent viloyatining tog‘li yerlarida lavanda yetishtirish bo‘yicha hamkorlik va tajriba uchun yer berishga tayyorligini bildirdi”, — deydi Behzod Qobulov.
Tashrifning uchinchi kunida delegatsiya vakillari 60 dan ortiq yirik Xitoy korporatsiyalarini birlashtirgan “Bir kamar, bir yo‘l” uyushmasi rahbari bilan uchrashuv o‘tkazgan.
“Turizm va yashil energiya sohasida faoliyat olib borayotgan mazkur assotsiatsiya kelgusida ‘Bir belbog‘, bir yo‘l’ tadbirini o‘tkazish uchun obyektning alohida qurilayotgan ‘O‘zbekiston’ binosini arxitektor va geolog bilan taʼminlashini bildirdi. Shundan so‘ng ikki tomon ishbilarmonlari o‘rtasida ‘Toshkent viloyati — kelajak sari yuksalish — imkoniyatlar, sharoit va vakolat’ mavzusida biznes-forum bo‘lib o‘tdi. Unda XXR Xalq hukumati, tarmoq birlashmalari rahbarlari, shuningdek, O‘zbekistonning 50 dan ortiq yetakchi kompaniya va korporatsiyalari vakillari ishtirok etdi. Tomonlar Toshkent viloyatining SHUARda vakolatxonasini ochish tashabbusini ilgari surdi va toshkentlik tadbirkor Zafarxo‘ja Usmonovni vakolatxona rahbari etib tayinlash taklif etildi”, — deydi hokimlik axborot xizmati rahbari.
Izoh (0)