Хитой Халқ Республикасида Тошкент вилояти ваколатхонаси ташкил этилади. Унга тадбиркор Зафархўжа Усмоновни раҳбар этиб тайинлашга келишиб олинган. Бу ҳақда вилоят ҳокими Зоир Мирзаев бошчилигидаги Тошкент вилояти делегациясининг Хитой Халқ Республикасига ташрифи давомида сўз борган.
Вилоят ҳокимлиги ахборот хизмати раҳбари Беҳзод Қобуловнинг “Дарё”га билдиришича, делегация вакиллари дастлаб Шинжон-уйғур автоном районига бориб, Урумчи шаҳридаги “Юқори технологиялар зонаси”га ташриф буюрган.
“У ердаги тиббиёт мажмуасини рақамлаштириш жараёнларига алоҳида эътибор қаратилди. Ҳоким янги иш услубларини юқори баҳолади. Куннинг иккинчи ярмида Тошкент вилояти делегацияси мазкур ҳудудда Коммунистик партия котиби Ма Синруи билан учрашди. Партия котиби меҳмонларни Хитой — Марказий Осиё саммити муваффақиятли ўтгани билан табриклади. Ҳоким Хитой билан самарали ҳамкорлик қилиш муҳимлигини таъкидлаб, қурилиш, электротехника, қишлоқ хўжалиги, енгил саноат, чарм маҳсулотларини ишлаб чиқариш, шунингдек, ишлаб чиқаришга рақамли технологиялар, муқобил энергия манбаларини жорий этиш, қуёш панелларини ўрнатиш, туризм, фан ва маданият каби соҳаларда ҳамкорлик қилиш таклифини илгари сурди”, — дейди Беҳзод Қобулов.
Таъкидланишича, Хитой томони Тошкент вилоятида қурилиш материаллари, хусусан сантехника буюмлари, чинни ишлаб чиқарувчи тадбиркорлардан иборат йирик делегация шакллантириб, бизнес-форум ташкил этиш нияти борлигини билдирган. Зоир Мирзаев эса буни қўллаб-қувватлаган.
“Вилоят ҳокими хитойликларга Тошкент вилоятининг тоғли ерларида лаванда етиштириш бўйича ҳамкорлик ва тажриба учун ер беришга тайёрлигини билдирди”, — дейди Беҳзод Қобулов.
Ташрифнинг учинчи кунида делегация вакиллари 60 дан ортиқ йирик Хитой корпорацияларини бирлаштирган “Бир камар, бир йўл” уюшмаси раҳбари билан учрашув ўтказган.
“Туризм ва яшил энергия соҳасида фаолият олиб бораётган мазкур ассоциация келгусида ‘Бир белбоғ, бир йўл’ тадбирини ўтказиш учун объектнинг алоҳида қурилаётган ‘Ўзбекистон’ биносини архитектор ва геолог билан таъминлашини билдирди. Шундан сўнг икки томон ишбилармонлари ўртасида ‘Тошкент вилояти — келажак сари юксалиш — имкониятлар, шароит ва ваколат’ мавзусида бизнес-форум бўлиб ўтди. Унда ХХР Халқ ҳукумати, тармоқ бирлашмалари раҳбарлари, шунингдек, Ўзбекистоннинг 50 дан ортиқ етакчи компания ва корпорациялари вакиллари иштирок этди. Томонлар Тошкент вилоятининг ШУАРда ваколатхонасини очиш ташаббусини илгари сурди ва тошкентлик тадбиркор Зафархўжа Усмоновни ваколатхона раҳбари этиб тайинлаш таклиф этилди”, — дейди ҳокимлик ахборот хизмати раҳбари.
Изоҳ (0)