Rossiya qo‘shinlari 19-mayga o‘tar kechasi Ukrainaga yangi aviazarbalar berdi. Kiyev shahar harbiy ma’muriyati rahbari Sergey Popkoning aytishicha, Ukraina poytaxti may oyining boshidan beri o‘ninchi marta havo hujumiga uchragan: Shahed dronlari Kiyevga tunda “bir necha to‘lqinlarda, qisqa intervallar oralig‘ida” uchirilgan. Uning so‘zlariga ko‘ra, rus harbiylari bunday taktikalar bilan Ukraina havo hujumidan mudofaa tizimlarini yo‘q qilishga, shuningdek, tinch aholiga psixologik ta’sir ko‘rsatishga harakat qilmoqda.
“Kiyev yo‘nalishida aniqlangan havo nishonlarining barchasi havo hujumidan mudofaa kuchlari va vositalari tomonidan yo‘q qilindi. Kiyevga hujumni uddalay olishmadi!” — uning bayonoti maʼmuriyatning Telegram kanalida keltirildi.
Krivoy Rog shahrida tunda sodir bo‘lgan ketma-ket portlashlar oqibatida ikki kishi jabrlandi, dedi Dneprbo‘yi viloyati harbiy ma’muriyati rahbari Sergey Lisak. Unga ko‘ra, Rossiya harbiylari xususiy sanoat korxonasi va to‘rt qavatli ma’muriy binoga hujum qilgan. “Ustaxonalarga zarar yetdi, jihozlar vayron bo‘ldi. Bir nechta binolar yonib ketdi”, — deb yozadi u Telegram’da. “Jabrlanganlar — 64 yoshli ayol va 45 yoshli erkak”.
Lvov viloyati harbiy ma’muriyati rahbari Maksim Kozitskiyning aytishicha, ertalab soat to‘rtdan beshgacha Shahed dronlari viloyatga hujum qilgan, havo hujumidan mudofaa tizimlari bunga javob qaytargan.
Lvov meri Andrey Sadoviyning aytishicha, dronlar nishoni shaharning muhim infratuzilmasi bo‘lgan. Hujumda qurbonlar yo‘q.
Ukraina Qurolli kuchlari Harbiy-havo kuchlari qo‘mondonligining ma’lum qilishicha, tungi hujum paytida havo hujumidan mudofaa tizimlari 16 ta Shahed-136/131 dronini va uchta “Kalibr” qanotli raketalarini urib tushirgan. Ukraina osmonida hammasi bo‘lib 22 ta dron va oltita raketa qayd etilgan.
Rossiya Mudofaa vazirligi hozircha Ukraina shaharlariga qilingan yangi hujumga izoh bermadi.
Izoh (0)