Россия қўшинлари 19 майга ўтар кечаси Украинага янги авиазарбалар берди. Киев шаҳар ҳарбий маъмурияти раҳбари Сергей Попконинг айтишича, Украина пойтахти май ойининг бошидан бери ўнинчи марта ҳаво ҳужумига учраган: Shahed дронлари Киевга тунда “бир неча тўлқинларда, қисқа интерваллар оралиғида” учирилган. Унинг сўзларига кўра, рус ҳарбийлари бундай тактикалар билан Украина ҳаво ҳужумидан мудофаа тизимларини йўқ қилишга, шунингдек, тинч аҳолига психологик таъсир кўрсатишга ҳаракат қилмоқда.
“Киев йўналишида аниқланган ҳаво нишонларининг барчаси ҳаво ҳужумидан мудофаа кучлари ва воситалари томонидан йўқ қилинди. Киевга ҳужумни уддалай олишмади!” — унинг баёноти маъмуриятнинг Telegram каналида келтирилди.
Кривой Рог шаҳрида тунда содир бўлган кетма-кет портлашлар оқибатида икки киши жабрланди, деди Днепрбўйи вилояти ҳарбий маъмурияти раҳбари Сергей Лисак. Унга кўра, Россия ҳарбийлари хусусий саноат корхонаси ва тўрт қаватли маъмурий бинога ҳужум қилган. “Устахоналарга зарар етди, жиҳозлар вайрон бўлди. Бир нечта бинолар ёниб кетди”, — деб ёзади у Telegramъда. “Жабрланганлар — 64 ёшли аёл ва 45 ёшли эркак”.
Лвов вилояти ҳарбий маъмурияти раҳбари Максим Козицкийнинг айтишича, эрталаб соат тўртдан бешгача Shahed дронлари вилоятга ҳужум қилган, ҳаво ҳужумидан мудофаа тизимлари бунга жавоб қайтарган.
Лвов мэри Андрей Садовийнинг айтишича, дронлар нишони шаҳарнинг муҳим инфратузилмаси бўлган. Ҳужумда қурбонлар йўқ.
Украина Қуролли кучлари Ҳарбий-ҳаво кучлари қўмондонлигининг маълум қилишича, тунги ҳужум пайтида ҳаво ҳужумидан мудофаа тизимлари 16 та Shahed-136/131 дронини ва учта “Калибр” қанотли ракеталарини уриб туширган. Украина осмонида ҳаммаси бўлиб 22 та дрон ва олтита ракета қайд этилган.
Россия Мудофаа вазирлиги ҳозирча Украина шаҳарларига қилинган янги ҳужумга изоҳ бермади.
Изоҳ (0)