Qirolicha Yelizaveta II ning dafn marosimi va bir necha kun davom etgan motam tadbirlari Buyuk Britaniya budjetga taxminan 162 million funt sterling yoki 201 million dollarga tushdi, dedi mamlakat moliya vazirining iqtisodiy masalalar bo‘yicha o‘rinbosari Jon Glen.
Yelizaveta II 2022-yil 8-sentabrda 96 yoshida vafot etgandi, dafn marosimi 19-sentabrda bo‘lib o‘tdi. Milliy motam o‘n kun davom etdi, bu vaqt ichida qirolichaning tobuti qo‘yilgan Vestminster saroyiga yuz minglab odamlar tashrif buyurdi.
“Qirol hazratlari va qirollik oilasining boshqa a’zolarini qo‘llab-quvvatlash uchun juda ko‘p odamlar keldi. Hukumatning ustuvor vazifalari ushbu tadbirlarning muammosiz va munosib darajada o‘tishini ta’minlash edi”, — dedi Glen va fuqarolar xavfsizligini kafolatlash zarur bo‘lganini ham ta’kidladi.
Britaniya Ichki ishlar vazirligi (74 million funt sterling) hamda Raqamli, madaniyat, media va sport vazirligi (57 million funt) eng ko‘p mablag‘ sarflagan. Moliya vazirligi ma’lum qilishicha, Shotlandiya hukumati (18,8 million funt), Uels va Shimoliy Irlandiya (har biri 2 million funt) xarajatlari markaziy budjetdan qoplangan.
Yelizaveta II vafotidan so‘ng uning o‘g‘li Charlz III Buyuk Britaniya qiroli bo‘ldi, 6-may kuni Vestminster abbatligida uning toj kiyish marosimi bo‘lib o‘tdi. Tadbirga 3 mingga yaqin mehmon taklif qilindi. Marosimning narxi rasman oshkor etilmagan, biroq Euronews intervyu bergan ekspertlarga ko‘ra, u 57 milliondan 113 million yevrogacha tushgan bo‘lishi mumkin.
Izoh (0)