“Vagner” xususiy harbiy kampaniyasiga qo‘shilishni istagan rossiyalik harbiylar 15 yilgacha qamoq jazosiga hukm qilinishi mumkin. Bu haqda davlat Dumasi mudofaa qo‘mitasi aʼzosi, general-leytenant Viktor Sobolev maʼlum qildi.
Sobolevning so‘zlariga ko‘ra, xususiy harbiy kampaniyalarning faoliyati Rossiya qonunlariga ziddir va yollanma ishchi sifatida ro‘yxatdan o‘tgan harbiylar qamoq jazosiga hukm qilinishi mumkin.
“Xususiy harbiy kampaniya noqonuniy qurolli tuzilma, u qayerda ro‘yxatdan o‘tgani va nima bilan shug‘ullanishi nomaʼlum. Agar ular (armiyaga safarbar qilinganlar) harbiy bo‘linmada bo‘lsa, ular o‘sha bo‘linmalarda qolsin va vazifalarni bajarsin. Ular armiyani frontda tark eta olmaydi. Bir qator qonunlar harbiy qismlarni ruxsatsiz tashlab ketishni taqiqlaydi va buning uchun jinoiy jazo: 10 yildan 15 yilgacha qamoq jazosi belgilaydi”, — deydi Sobolev.
“Vagner” qanday guruh?
Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.
“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.
U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini maʼlum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.
Izoh (0)