Namanganda 1 kilodan ortiq giyohvandlik moddasini sotishga uringan 29 yashar yigit qo‘lga olindi (video)

Namangan viloyati IIB Jinoyat-qidiruv xizmati tomonidan 1 kilogrammdan ortiq giyohvandlik moddasini sotishga uringan shaxs qo‘lga olindi. Bu haqda “Daryo” muxbiri Azizbek Abduvaliyev xabar bermoqda.

Mazkur xizmat uyushgan jinoyatchilikka qarshi kurashish bo‘limi vakillari tomonidan joriy yil 10-may kuni tezkor tadbir o‘tkazildi. Tadbir davomida 1994-yilda tug‘ilgan shaxs o‘zida bo‘lgan giyohvandlik vositasini 12500 AQSH dollariga baholab, Namangan shahar, “Axsikent” mahallasi hududida Lacetti avtomashinasida shartli xaridorga sotishga uringan payt ashyoviy dalillar bilan ushlangan.

Namangan viloyat IIB Ekspertiza-kriminalistika markazi xulosasiga ko‘ra, gumonlanuvchidan olingan giyohvandlik vositasi gashish bo‘lib, uning sof og‘irligi 1 kilodan ortiqni tashkil etgan.

Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.