“Vaqtida registratsiyadan o‘tmasangiz jarima yoki zapret javobgarligi bor” — yurist Rossiyaga borgan chet el fuqarosidan nimalar talab etilishi haqida

Yurist Zarnigor Omonillayeva Telegram’dagi kanalida Rossiyaga borgach, barcha xorijiy davlatlar fuqarolaridan nimalar talab etilishi haqida maʼlumot berdi.

“Bu talablar barchaga teng tegishli. Migrantlarga ham, talabalarga ham, dam olish yoki mehmonga kelganlarga ham”, — deb yozadi u.

Zarnigor Omonillayevaning yozishicha, avvalo, hujjat masalasiga jiddiy eʼtibor qaratish talab etiladi.

“Rossiyaga kirib kelishingiz bilan, chegarada qo‘lingizga berilayotgan migratsion kartani tekshiring. Ichida familiya, ismingiz, otangiz ismi, pasport maʼlumotlaringiz xatosiz yozilgan bo‘lishi kerak. Bitta harfga ham xato bo‘lmasligi lozim. Aks holda xatolik tufayli hujjat tayyorlash yoki boshqa jarayonlarda qiyinchilikka uchraysiz. Natijada migratsion kartani yangilash uchun qaytadan chegaraga borib-kelishga to‘g‘ri keladi.

Kirib kelgan kuningizdan boshlab 15 kun ichida yashab turgan joyingiz bo‘yicha “migratsion qayd”dan o‘tishingiz, yaʼni registratsiya qilishingiz kerak. Registratsiya qilmaganlarga jarima yoki zapret javobgarligi bor”, — deya maslahat bergan u.

Yuristning qayd etishicha, Rossiyaga ishlash maqsadida borganlar mamlakatga kirgan kunidan boshlab, 30 kun ichida patentga hujjat topshirishi kerak bo‘ladi. Agar belgilangan muddatdan kech qolinsa, jarima yoki xizmat ko‘rsatishda rad javobini olish aniq.

“O‘qishga kelgan bo‘lsangiz 3 oy ichida o‘qishga kirganingiz haqida hujjat olishingiz kerak. Usiz registratsiyani uzaytira olmaysiz. Oila aʼzolaringiz oldiga kelgan bo‘lsangiz 90 kun tugashiga 10 kun qolganida MVDga borib, registratsiyangizni yana uzaytirishingiz lozim.

Qanday maqsadda bo‘lmasin 90 kundan ko‘p muddatga kelgan bo‘lsangiz, kirib kelgan kuningizdan boshlab 90 kun o‘tmasidan tibbiy ko‘riklar, daktiloskopiya va biometrik rasmga tushish jarayonlaridan o‘tilishi kerak. Tibbiy ko‘rik natijasini o‘zingiz MVDga olib borib topshirishingiz lozim. Topshirgan tibbiy tekshiruv natajalaringiz bir yilga amal qiladi. Bir yildan keyin yana qayta topshirish kerak bo‘ladi”, — deya ta’kidlagan.

Zarnigor Omonillayevaning qo‘shimcha qilishicha, Rossiyaga ishlash uchun borganlar patent tayyorlash jarayonida daktiloskopiya, rasmga tushish va tibbiy tekshiruvlardan o‘tadi. Shuning uchun bu majburiyatlarni alohida bajarish shart emas.