“Вақтида регистрациядан ўтмасангиз жарима ёки запрет жавобгарлиги бор” — юрист Россияга борган чет эл фуқаросидан нималар талаб этилиши ҳақида

Юрист Зарнигор Омониллаева Telegram’даги каналида Россияга боргач, барча хорижий давлатлар фуқароларидан нималар талаб этилиши ҳақида маълумот берди.

“Бу талаблар барчага тенг тегишли. Мигрантларга ҳам, талабаларга ҳам, дам олиш ёки меҳмонга келганларга ҳам”, — деб ёзади у.

Зарнигор Омониллаеванинг ёзишича, аввало, ҳужжат масаласига жиддий эътибор қаратиш талаб этилади.

“Россияга кириб келишингиз билан, чегарада қўлингизга берилаётган миграцион картани текширинг. Ичида фамилия, исмингиз, отангиз исми, паспорт маълумотларингиз хатосиз ёзилган бўлиши керак. Битта ҳарфга ҳам хато бўлмаслиги лозим. Акс ҳолда хатолик туфайли ҳужжат тайёрлаш ёки бошқа жараёнларда қийинчиликка учрайсиз. Натижада миграцион картани янгилаш учун қайтадан чегарага бориб-келишга тўғри келади.

Кириб келган кунингиздан бошлаб 15 кун ичида яшаб турган жойингиз бўйича “миграцион қайд”дан ўтишингиз, яъни регистрация қилишингиз керак. Регистрация қилмаганларга жарима ёки запрет жавобгарлиги бор”, — дея маслаҳат берган у.

Юристнинг қайд этишича, Россияга ишлаш мақсадида борганлар мамлакатга кирган кунидан бошлаб, 30 кун ичида патентга ҳужжат топшириши керак бўлади. Агар белгиланган муддатдан кеч қолинса, жарима ёки хизмат кўрсатишда рад жавобини олиш аниқ.

“Ўқишга келган бўлсангиз 3 ой ичида ўқишга кирганингиз ҳақида ҳужжат олишингиз керак. Усиз регистрацияни узайтира олмайсиз. Оила аъзоларингиз олдига келган бўлсангиз 90 кун тугашига 10 кун қолганида МВДга бориб, регистрациянгизни яна узайтиришингиз лозим.

Қандай мақсадда бўлмасин 90 кундан кўп муддатга келган бўлсангиз, кириб келган кунингиздан бошлаб 90 кун ўтмасидан тиббий кўриклар, дактилоскопия ва биометрик расмга тушиш жараёнларидан ўтилиши керак. Тиббий кўрик натижасини ўзингиз МВДга олиб бориб топширишингиз лозим. Топширган тиббий текширув натажаларингиз бир йилга амал қилади. Бир йилдан кейин яна қайта топшириш керак бўлади”, — дея таъкидлаган.

Зарнигор Омониллаеванинг қўшимча қилишича, Россияга ишлаш учун борганлар патент тайёрлаш жараёнида дактилоскопия, расмга тушиш ва тиббий текширувлардан ўтади. Шунинг учун бу мажбуриятларни алоҳида бажариш шарт эмас.