Buxoro viloyati IIB ijtimoiy tarmoqlarda tarqalgan “Qorako‘l tumanidagi maktablardan birining psixologi”ning nomaqbul xatti-harakatlari tasvirlangan videoga munosabat bildirdi.
Qayd etilishicha, ushbu videorolikdagi qiz Qorako‘l tumani “Tinchlik” mahallasida yashovchi, tumandagi 4-sonli ixtisoslashtirilgan umumtaʼlim maktabning 10-sinf o‘quvchisi T.Sh. ekani (2007-yilda tug‘ilgan), u mazkur videoni 2 yil oldin o‘z uyida va telefoniga tasvirga olgani, videotasvir o‘ziga nomaʼlum bo‘lgan holatda ijtimoiy tarmoqlarda tarqalib ketgani aniqlangan.
Videotasvirlar ijtimoiy tarmoqlarda tarqab ketganidan so‘ng, voyaga yetmagan qizning buvisi T.T. tuman IIB boshlig‘i nomiga ariza bilan murojaat qilgan. Ayol nevarasi T.Sh.ning shaʼni va qadr-qimmati kamsitilganini bildirib, videoni tarqatgan shaxslarni topish va ularga nisbatan qonuniy chora ko‘rishni so‘ragan.
Holat yuzasidan tuman IIB huzuridagi tergov guruhi tomonidan Jinoyat kodeksining 141-3-moddasi 2-qismi “v” bandi (o‘n sakkiz yoshga to‘lmaganligi aybdorga ayon bo‘lgan shaxsning shaʼnini va qadr-qimmatini kamsituvchi hamda inson hayotining sir tutiladigan tomonlarini aks ettiruvchi maʼlumotlarini oshkor qilish) bilan jinoyat ishi qo‘zg‘atilib, hozirgi kunda tezkor texnik, surishtiruv hamda tergov harakatlari olib borilmoqda.
Ta’kidlanishicha, jinoyat ishi doirasida aybdorlarning shaxsiga to‘la aniqlik kiritilib, ularning harakatlariga huquqiy baho beriladi hamda jinoyat uchun jazo muqarrarligi taʼminlanadi.
“Hurmatli ijtimoiy tarmoq kuzatuvchilari, mustaqil jurnalist va blogerlar! Ommaviy axborot vositalari va ijtimoiy tarmoqlarda ushbu holatni turlicha talqin qilmaslikni, tergov harakatlarining odilona, xolis va to‘laqonli olib borilishiga shubha tug‘dirmasligingizni so‘rab qolamiz”, — deyiladi munosabatda.
O‘zbekistonda o‘zganing yalang‘och foto yoki videolarini tarqatish bilan qo‘rqitganlik uchun javobgarlik qanday?
Prezident tomonidan 11-aprel kuni “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun qabul qilingan.
Qonun bilan intim hayot daxlsizligini buzganlik uchun jinoiy javobgarlik belgilangan, ya’ni Jinoyat kodeksi quyidagi mazmundagi 141-3-modda bilan to‘ldirilgan:
“Shaxsning roziligisiz uning tanasining va (yoki) jinsiy a’zolarining yalang‘och holdagi foto yoki videotasvirini o‘z ichiga olgan ma’lumotlarni tarqatish, shu jumladan, ommaviy axborot vositalarida, telekommunikatsiya tarmoqlarida yoki internet jahon axborot tarmog‘ida tarqatish yoki bunday ma’lumotlarni tarqatish bilan qo‘rqitish — bazaviy hisoblash miqdorining 400 baravaridan 600 baravarigacha (120 million so‘mdan 180 million so‘mgacha) miqdorda jarima yoki 360 soatgacha majburiy jamoat ishlari yoxud uch yilgacha axloq tuzatish ishlari bilan jazolanadi.
O‘sha harakatlar:
a) takroran yoki xavfli retsidivist tomonidan;
b) bir guruh shaxslar tomonidan oldindan til biriktirib;
v) voyaga yetmagan shaxsga nisbatan sodir etilgan bo‘lsa,
360 soatdan 480 soatgacha majburiy jamoat ishlari yoki bir yildan uch yilgacha ozodlikni cheklash yoxud uch yilgacha ozodlikdan mahrum qilish bilan jazolanadi”.
Izoh (0)