Бухоро вилояти ИИБ ижтимоий тармоқларда тарқалган “Қоракўл туманидаги мактаблардан бирининг психологи”нинг номақбул хатти-ҳаракатлари тасвирланган видеога муносабат билдирди.
Қайд этилишича, ушбу видеороликдаги қиз Қоракўл тумани “Тинчлик” маҳалласида яшовчи, тумандаги 4-сонли ихтисослаштирилган умумтаълим мактабнинг 10-синф ўқувчиси Т.Ш. экани (2007 йилда туғилган), у мазкур видеони 2 йил олдин ўз уйида ва телефонига тасвирга олгани, видеотасвир ўзига номаълум бўлган ҳолатда ижтимоий тармоқларда тарқалиб кетгани аниқланган.
Видеотасвирлар ижтимоий тармоқларда тарқаб кетганидан сўнг, вояга етмаган қизнинг бувиси Т.Т. туман ИИБ бошлиғи номига ариза билан мурожаат қилган. Аёл невараси Т.Ш.нинг шаъни ва қадр-қиммати камситилганини билдириб, видеони тарқатган шахсларни топиш ва уларга нисбатан қонуний чора кўришни сўраган.
Ҳолат юзасидан туман ИИБ ҳузуридаги тергов гуруҳи томонидан Жиноят кодексининг 141-3-моддаси 2-қисми “в” банди (ўн саккиз ёшга тўлмаганлиги айбдорга аён бўлган шахснинг шаънини ва қадр-қимматини камситувчи ҳамда инсон ҳаётининг сир тутиладиган томонларини акс эттирувчи маълумотларини ошкор қилиш) билан жиноят иши қўзғатилиб, ҳозирги кунда тезкор техник, суриштирув ҳамда тергов ҳаракатлари олиб борилмоқда.
Таъкидланишича, жиноят иши доирасида айбдорларнинг шахсига тўла аниқлик киритилиб, уларнинг ҳаракатларига ҳуқуқий баҳо берилади ҳамда жиноят учун жазо муқаррарлиги таъминланади.
“Ҳурматли ижтимоий тармоқ кузатувчилари, мустақил журналист ва блогерлар! Оммавий ахборот воситалари ва ижтимоий тармоқларда ушбу ҳолатни турлича талқин қилмасликни, тергов ҳаракатларининг одилона, холис ва тўлақонли олиб борилишига шубҳа туғдирмаслигингизни сўраб қоламиз”, — дейилади муносабатда.
Ўзбекистонда ўзганинг яланғоч фото ёки видеоларини тарқатиш билан қўрқитганлик учун жавобгарлик қандай?
Президент томонидан 11 апрель куни “Хотин-қизлар ва болалар ҳуқуқлари, эркинликлари ҳамда қонуний манфаатларини ишончли ҳимоя қилиш тизими янада такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги қонун қабул қилинган.
Қонун билан интим ҳаёт дахлсизлигини бузганлик учун жиноий жавобгарлик белгиланган, яъни Жиноят кодекси қуйидаги мазмундаги 141-3-модда билан тўлдирилган:
“Шахснинг розилигисиз унинг танасининг ва (ёки) жинсий аъзоларининг яланғоч ҳолдаги фото ёки видеотасвирини ўз ичига олган маълумотларни тарқатиш, шу жумладан, оммавий ахборот воситаларида, телекоммуникация тармоқларида ёки интернет жаҳон ахборот тармоғида тарқатиш ёки бундай маълумотларни тарқатиш билан қўрқитиш — базавий ҳисоблаш миқдорининг 400 бараваридан 600 бараваригача (120 миллион сўмдан 180 миллион сўмгача) миқдорда жарима ёки 360 соатгача мажбурий жамоат ишлари ёхуд уч йилгача ахлоқ тузатиш ишлари билан жазоланади.
Ўша ҳаракатлар:
а) такроран ёки хавфли рецидивист томонидан;
б) бир гуруҳ шахслар томонидан олдиндан тил бириктириб;
в) вояга етмаган шахсга нисбатан содир этилган бўлса,
360 соатдан 480 соатгача мажбурий жамоат ишлари ёки бир йилдан уч йилгача озодликни чеклаш ёхуд уч йилгача озодликдан маҳрум қилиш билан жазоланади”.
Изоҳ (0)