Amnesty International tashkiloti “aparteidni avtomatlashtirish” nomli hisobotida mamlakatlarni Isroilni kuzatuv texnologiyasi bilan ta’minlashga yo‘l qo‘ymaslik uchun o‘z kompaniyalarini tartibga solishga chaqirdi.
“Isroil hukumati bosib olingan hududlarda aparteid rejimini o‘rnatish uchun yuzni tanish texnologiyasidan foydalanmoqda”, — deyiladi hisobotda.
Tashkilot, shuningdek, Isroilga qurol va mudofaa texnologiyalari sotishni to‘xtatishga chaqiradi. G‘arbiy Sohilda va xususan Xevronda yuzni tanish texnologiyasidan foydalanish haqida ma’lumotlar avval ham e’lon qilingan, biroq joriy hisobotda shahardagi nazorat punktlarida o‘rnatilgan ilg‘or tizim haqida qo‘shimcha ma’lumotlar keltirilgan.
Falastinliklar Red Wolf (Qizil bo‘ri) nazorat punktidan o‘tayotganda, ularning yuzi o‘zi bilmagan holda skanerdan o‘tkaziladi va falastinliklar haqidagi mavjud ma’lumotlar bazalarida topilgan ma’lumotlar bilan taqqoslanadi. Noma’lum yuzlar tizimda avtomatik ravishda saqlanadi.
Tashkilot ma’lumotlariga ko‘ra, shaxs tizimda ko‘rinmasa, shuningdek, u noqonuniy faoliyatda gumon qilingani aniqlansa, nazorat-o‘tkazish punktidan o‘tkazilmaydi.
Amnesty’ga ko‘ra, Red Wolf boshqa ikkita kuzatuv tizimi — Wolf Pack va Blue Wolf bilan bog‘liqligi haqida “kuchli dalillar” mavjud bo‘lib, ularning tafsilotlari avvalroq e’lon qilingan. Wolf Pack — bu hududlardagi falastinliklarning ma’lumotlar bazasi, Blue Wolf — bu Isroil kuchlari tomonidan ma’lumotlarni olish uchun ishlatiladigan mobil telefon ilovasi.
Tashkilot hisobotning yana bir qismi Sharqiy Quddusda kuzatuv kameralaridan foydalanishga qaratilgan. Tashkilot ma’lumotlariga ko‘ra, Shayx Jarrah va Silvanda o‘rnatilgan videokuzatuv kameralari soni 2021-yilning may oyida sezilarli darajada oshgan. Amnesty International Xitoyning Hikivision va Niderlandiyaning TKH Security Solutions kompaniyasining videokuzatuv kameralari Sharqiy Quddusda topilganini da’vo qilmoqda. TKH Security bunga javoban hozirda Isroil xavfsizlik kuchlari bilan to‘g‘ridan-to‘g‘ri biznes aloqalari yo‘qligini aytdi.
“Isroil hukumati falastinliklarga qarshi segregatsiyani (kundalik hayotda odamlarni irqiy, etnik yoki boshqa guruhlarga majburan ajratish) kuchaytirish va aparteidni (irqiy segregatsiyaning rasmiy siyosati) avtomatlashtirish uchun murakkab kuzatuv vositalaridan foydalanmoqda. Xevronning H2 hududida biz yangi Red Wolf yuzni aniqlash tizimi harakatlarni kuzatish va nazorat qilish uchun falastinliklar haqida noqonuniy biometrik ma’lumotlar to’plashini aniqladik”, — deydi Amnesty International bosh kotibi Anis Kalamar.
Isroil mudofaa kuchlari bunga javoban Yahudiya va Samariyada tartib va xavfsizlikni ta’minlashga harakat qilayotganini aytdi
“Terrorizmga qarshi kurash doirasida armiya zarur xavfsizlik va razvedka operatsiyalarini olib boradi va bu terrorchilar tomonidan, jumladan, Falastin aholisiga yetkazilgan zararni kamaytirish maqsadida amalga oshiriladi”, — deydi Isroil kuchlari.
Izoh (0)