Rossiya IIV 2023-yilning dastlabki uch oyida 106 mingdan ortiq xorijlik mamlakat fuqaroligini olganini ma’lum qildi. Bu o‘tgan yilga nisbatan 35 ming kishiga kam degani.
“2023-yilning yanvar—mart oylarida Rossiya fuqaroligini olishi to‘g‘risida qaror qabul qilingan shaxslar soni 106 320 nafarni tashkil etadi”, — deyiladi hujjatda.
Ma’lum qilinishicha, uch oy davomida Tojikiston fuqarolari tomonidan Rossiya fuqaroligini olish bo‘yicha 44,9 mingta qaror qabul qilingan. Shu bilan birga, 22 ming Ukraina va 8,9 ming Armaniston fuqarolari Rossiya fuqaroligini olgan.
Shuningdek, o‘ntalikka Qozog‘iston (6,9 ming), Qirg‘iziston (5,4 ming), O‘zbekiston (4,7 ming), Ozarbayjon (3,7 ming), Moldova (3,1 ming), Belarus (2,4 ming) va Turkmaniston (912 kishi) fuqarolari ham kirgan.
Yanvar o‘rtalarida Rossiya Tergov qo‘mitasi rahbari Aleksandr Bastrikin oxirgi besh yil ichida Markaziy Osiyo va Kavkaz davlatlaridan kelgan milliondan ortiq kishi, jumladan, Tojikiston, O‘zbekiston va Qirg‘izistondan 550 ming kishi Rossiya fuqaroligini olganini aytgandi.
“2022-yilning birinchi yarmida yuqorida ko‘rsatilgan davlatlarning 60 mingdan ortiq voyaga yetgan fuqarolari Rossiya fuqaroligini oldi. Shuning uchun ular mamlakatni himoya qilishning konstitutsiyaviy majburiyatini ham olgan. Shu munosabat bilan, fuqarolikka qabul qilingan shaxslarning maxsus harbiy operatsiya vazifalarini amalga oshirishda ishtirok etishi masalasini ko‘rib chiqish maqsadga muvofiqdir”, — degandi u.
Ko‘p o‘tmay Rossiyaga ishlashga kelib, keyinchalik Rossiya fuqaroligini olgan Markaziy Osiyo mamlakatlari fuqarolari Rossiyani tark etib, uyga qaytib keta olmasligi, chunki ularga nisbatan safarbarlik to‘g‘risidagi qonunlar amal qilishi ma’lum bo‘lgandi.
Izoh (0)