Rossiya fuqaroligini olmagan ukrainaliklar anneksiya qilingan hududlardan deportatsiya qilinishi mumkin

Rossiya prezidenti Vladimir Putin Rossiya fuqaroligini qabul qilmagan fuqarolarni anneksiya qilingan Ukraina hududlaridan kelajakda deportatsiya qilish imkonini beruvchi farmonni imzoladi.

Hujjatga ko‘ra, Ukraina fuqarolari o‘zini DXR (Donetsk xalq respublikasi) va LXR (Lugansk xalq respublikasi) deb e’lon qilgan hududlar pasportlarini olishi yo Rossiya fuqarosi bo‘lishi kerak. Aks holda fuqarolikni qabul qilmaslik istagini bildirishlari kerak bo‘ladi.

Oxirgi variantni tanlaganlar 2024-yil 1-iyuldan boshlab xorijlik hisoblanadi va shunga ko‘ra anneksiya qilingan hududlardan chiqarib yuborilishi mumkin.

Farmonning alohida bandi Rossiyaning “milliy xavfsizligiga tahdid soluvchi” shaxslarni deportatsiya qilish bilan bog‘liq. Rossiyada “konstitutsiyaviy tuzum asoslarini zo‘ravonlik bilan o‘zgartirish” tarafdori bo‘lgan, terrorchilik va ekstremistik faoliyatni moliyalashtirayotgan yoki “ruxsat etilmagan” harakatlarda ishtirok etayotgan qo‘shib olingan hududlar aholisi deportatsiya qilinadi va mamlakatga kirishi taqiqlanadi.