Россия ИИВ 2023 йилнинг дастлабки уч ойида 106 мингдан ортиқ хорижлик мамлакат фуқаролигини олганини маълум қилди. Бу ўтган йилга нисбатан 35 минг кишига кам дегани.
“2023 йилнинг январь—март ойларида Россия фуқаролигини олиши тўғрисида қарор қабул қилинган шахслар сони 106 320 нафарни ташкил этади”, — дейилади ҳужжатда.
Маълум қилинишича, уч ой давомида Тожикистон фуқаролари томонидан Россия фуқаролигини олиш бўйича 44,9 мингта қарор қабул қилинган. Шу билан бирга, 22 минг Украина ва 8,9 минг Арманистон фуқаролари Россия фуқаролигини олган.
Шунингдек, ўнталикка Қозоғистон (6,9 минг), Қирғизистон (5,4 минг), Ўзбекистон (4,7 минг), Озарбайжон (3,7 минг), Молдова (3,1 минг), Беларусь (2,4 минг) ва Туркманистон (912 киши) фуқаролари ҳам кирган.
Январь ўрталарида Россия Тергов қўмитаси раҳбари Александр Бастрикин охирги беш йил ичида Марказий Осиё ва Кавказ давлатларидан келган миллиондан ортиқ киши, жумладан, Тожикистон, Ўзбекистон ва Қирғизистондан 550 минг киши Россия фуқаролигини олганини айтганди.
“2022 йилнинг биринчи ярмида юқорида кўрсатилган давлатларнинг 60 мингдан ортиқ вояга етган фуқаролари Россия фуқаролигини олди. Шунинг учун улар мамлакатни ҳимоя қилишнинг конституциявий мажбуриятини ҳам олган. Шу муносабат билан, фуқароликка қабул қилинган шахсларнинг махсус ҳарбий операция вазифаларини амалга оширишда иштирок этиши масаласини кўриб чиқиш мақсадга мувофиқдир”, — деганди у.
Кўп ўтмай Россияга ишлашга келиб, кейинчалик Россия фуқаролигини олган Марказий Осиё мамлакатлари фуқаролари Россияни тарк этиб, уйга қайтиб кета олмаслиги, чунки уларга нисбатан сафарбарлик тўғрисидаги қонунлар амал қилиши маълум бўлганди.
Изоҳ (0)