Jo Bayden ma’muriyati Tayvan uchun 500 million dollarlik qurol-yarog‘ paketini tayyorlamoqda, deya xabar berdi Bloomberg manbalari.
Xitoy o‘z hududi deb da’vo qilayotgan orol davlatga aynan qanday qurollar yuborilishi hozircha ma’lum emas.
Bloomberg ma’lumotlariga ko‘ra, AQSH prezidentining ko‘rsatmasi bilan “qurol yoki yordamchi uskunalar” allaqachon mavjud bo‘lgan AQSH zaxiralaridan ajratiladi. 2022-yil dekabr oyida qabul qilingan mudofaa budjeti AQSH prezidentining Tayvanga 1 milliard dollargacha harbiy yordamni mavjud zaxiralar hisobidan tezlashtirilgan tarzda yetkazishga imkon beradi.
Tayvan va AQSH o‘rtasidagi o‘zaro hamkorlik sharoitida Xitoy so‘nggi oylarda muntazam ravishda Tayvan yaqinida yirik harbiy mashg‘ulotlar o‘tkazdi. 2022-yil sentabrida Jo Bayden AQSH armiyasi Tayvanni Xitoy hujumidan himoya qilishda ishtirok etishiga va’da berdi. Amerika razvedkasi Xitoy orolni nazorat qilish uchun harbiy ssenariy tayyorlamoqda, deb hisoblaydi.
Izoh (0)