Rossiya mudofaa vaziri Sergey Shoygu Janubiy harbiy okrugda o‘tkazilgan tekshiruvda Ukrainadagi urush hududiga qurol-yarog‘ yetkazib berishni “alohida nazoratda saqlash” bo‘yicha topshiriq berdi. Bu haqda Rossiya Mudofaa vazirligi ma’lum qildi.
Qayd etilishicha, mudofaa vazirining qurolli kuchlarning moddiy-texnik ta’minotiga mas’ul bo‘lgan o‘rinbosari Kuzmenkov Sergey Shoyguga korxonalar tomonidan yetkazib berilgan zamonaviy tanklar, jangovar zirhli mashinalar, maxsus texnikalardan iborat yangi partiyani namoyish etgan.
Rossiya harbiy idorasi rahbari Kuzmenkovga “maxsus harbiy operatsiya” o‘tkazilayotgan hududlardagi qo‘shinlarni kerakli qurollanish hamda harbiy texnikalar bilan uzluksiz ta’minlash masalasini alohida nazoratga olish vazifasini qo‘ydi.
5-may kuni “Vagner” XHK asoschisi Yevgeniy Prigojin Shoygu va Bosh shtab boshlig‘i Valeriy Gerasimovni o‘q-dorilar tanqisligi sababli o‘z jangchilari o‘limida ayblayotgani va behayo so‘zlar bilan so‘kayotgani tasvirlangan video ijtimoiy tarmoqlarda tarqalgan edi. Video halok bo‘lgan yollanma askarlarning jasadlari fonida yozib olingan.
Bir necha soat o‘tgach, Prigojin yangi videoni eʼlon qilib, 10-may kuni o‘z jangchilarini Baxmutdan olib chiqib ketishini aytdi, chunki “o‘q-dorilar tanqis bo‘lgan vaziyatda ular ma’nisiz o‘limga mahkum”.
“Vagner” qanday guruh?
Ko‘plab G‘arb OAVlari “Vagner” guruhi to‘g‘ridan to‘g‘ri Vladimir Putinga bo‘ysunishini yozadi. Uning yollanma jangchilari bolalarni o‘ldirish, ayollarni zo‘rlash va qiynoqqa solish, shuningdek, shafqatsiz qotilliklarda ayblanib keladi.
“Konkord” kompaniyasi egasi bo‘lgan Yevgeniy Prigojin 2016-yildan buyon AQSH, 2020-yildan buyon esa Yevroittifoq sanksiyalari ostidadir. Vashingtonda u Internet tadqiqotlari agentligi (trollar fabrikasi) va “Vagner”ni nazorat qilishda ayblangan.
U “Vagner”ga aloqadorligini ko‘p marta rad etgan va bunday ayblovlar sababli sudlashgan, ammo 2022-yil sentabrida u “Vagner” asoschisi ekanini ma’lum qildi. Tashkilotni 2014-yilda, uning so‘zlariga ko‘ra, “Donbassda rus xalqiga nisbatan genotsid” boshlangan vaqtda tuzgan.
Izoh (0)