O‘zbekistonda aprel oyida ulgurji iste’molchilar tomonidan qariyb 30 million kub metr hajmdagi tabiiy gazdan noqonuniy foydalanilgani aniqlandi. Bu haqda Energetika vazirligi matbuot xizmati xabar berdi.
![](/static/2023/04/Fozilbek/photo_2023-05-04_19-23-06.jpg)
Qayd etilishicha, ishchi guruhlar tomonidan o‘tkazilgan nazorat tadbirlari davomida aprel oyida 262 ta holatda ulgurji iste’molchilar tomonidan 29,7 million kub metr hajmdagi tabiiy gazdan noqonuniy foydalanish holatlari aniqlangan. Noqonuniy foydalanish holatlari iste’molchilar toifasi bo‘yicha tahlil qilinganida, asosan:
- AGTKSHlarda — 4 ta holatda 0,5 milliard so‘m;
- issiqxonalarda — 3 ta holatda 0,8 milliard so‘m;
- ishlab chiqarish korxonalarida — (asfalt, ohak, gips, chinni mahsulotlari, non mahsulotlari) 43 ta holatda 10,8 milliard so‘m;
- umumiy ovqatlanish shoxobchalarida — 45 ta holatda 0,4 milliard so‘m;
- boshqa ulgurji iste’molchilar — 167 ta holatda 16,4 milliard so‘mni tashkil etgan.
Shuningdek, “O‘zenergoinspeksiya” va huquqni muhofaza qiluvchi organlar bilan hamkorlikda o‘tkazilgan nazorat tadbirlarida 225 ta holatda iste’molchilar tomonidan 10,9 million kVt/soat elektr energiyasidan noqonuniy foydalanish holatlari aniqlangan.
Buning natijasida tizimga 5,5 milliard so‘m zarar keltirilgan. Ushbu hajmdagi elektr energiyasi o‘rtacha 54 mingta xonadonning bir oylik iste’molini tashkil qiladi.
Noqonuniy foydalanish holatlarining eng ko‘pi Andijon, Sirdaryo, Surxondaryo va Toshkent viloyatlari hissasiga to‘g‘ri kelmoqda. Misol uchun, Andijon viloyatida yakka tartibdagi tadbirkor “Y.S.”ga qarashli sement mahsulotlarini ishlab chiqarish korxonasida 522 million so‘m, Sirdaryo viloyatidagi “Suv ta’minot” MChJda 340 million so‘m, Toshkent viloyatida yakka tartibdagi tadbirkor “X.M.”da 163 million so‘m miqdoridagi qayta hisoblash ishlari amalga oshirilgan
Qoidabuzar iste’molchilarga nisbatan belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etilgan
Jizzax, Andijon va Farg‘ona viloyatlarida elektrdan noqonuniy foydalanganlar 913,5 million so‘m zarar yetkazgani to‘g‘risida xabar berilgandi. Shuningdek, O‘zbekistonning uch viloyatida gaz va svetdan noqonuniy foydalanganlar qariyb 352 mln so‘m zarar yetkazgandi.
Izoh (0)