Respublikada mart va aprel oylarida yillik inflyatsiya sekinlashdi. May—iyunda ham sekinlashish davom etishi kutilyapti. Bu haqda 4-may kuni bo‘lib o‘tgan matbuot anjumanida Markaziy bank raisi Mamarizo Nurmurodov matbuot anjumanida maʼlum qildi, deya xabar berdi “Daryo” muxbiri.
Mamarizo Nurmurodovning aytishicha, may—iyun oylarida ham yillik inflyatsiya ko‘rsatkichining maʼlum darajada pasayishi kutilmoqda.
“Inflyatsiya dinamikasi mart va aprel oylarida ham sekinlashishda davom etdi, yillik hisobda mos ravishda 11,7 va 11,0 foiz darajalarida shakllandi (yanvar va fevral oylarida – 12,2 foiz). Ushbu pasayishda mavsumiy omillar va o‘tgan yildagi yuqori baza effektini ham taʼsirlari bor, albatta. Kelgusi may—iyun oylarida ham yillik inflyatsiya ko‘rsatkichining maʼlum darajada pasayishini kutyapmiz”, — dedi tashkilot rasmiysi.
Mart—aprel oylarida bazaviy inflyatsiya darajasida ham pasayish dinamikasi kuzatilib, mos ravishda yillik 12,9 va 12,5 foizgacha sekinlashgan (2022-yil dekabr oyida 13,8 foiz). Qolaversa, bazaviy inflyatsiyaning umumiy inflyatsiyaga hissasi o‘tgan yilning oktabr oyidan buyon birinchi marta 10 foiz banddan kamroqni tashkil etgan.
Shu bilan birga, bazaviy inflyatsiya darajasining umumiy inflyatsiyadan yuqori shakllanayotgani, iqtisodiyotda inflyatsion xatarlar saqlanib qolayotganini ifodalaydi.
“Narxlari 10 foizdan yuqori o‘sgan tovar va xizmatlar yig‘ma vaznining isteʼmol savati tarkibida oxirgi oylarda eng yuqori darajaga yetgani va mart oyida ham 60 foiz atrofida saqlanib qolayotgani ichki bozorlarda isteʼmol talabi va unga moslashayotgan taklif to‘liq muvozanatlashmaganini ham nisbatan qatʼiy pul-kredit sharoitlarini saqlab qolish zaruratini ko‘rsatmoqda. Xususan, 510 talik isteʼmol savatidagi 258 ta mahsulot va xizmatlarning narxi yillik 10 foizdan yuqori o‘sgan va ularning yig‘ma vazni savatchaning 60 foizigacha oshgan”, — dedi Mamarizo Nurmurodov.
Izoh (0)