“PSJ” futbolchisi Lionel Messi “Loryan”ga qarshi uchrashuvdagi mag‘lubiyatdan (1:3) keyin Saudiya Arabistoniga uchib ketdi. Bu Parij klubi rahbariyatiga yoqmadi va futbolchi 2 haftaga chetlatildi.
“PSJ” 30-mart, yakshanba kuni Fransiya chempionati 33-turida “Loryen”ga qarshi maydonga tushdi va 1:3 hisobida mag‘lubiyatga uchradi. Jamoa hujumchisi Lionel Messi to‘liq o‘yin o‘tkazdi. Uchrashuvdan bir necha soat o‘tib argentinalik futbolchi Saudiya Arabistoniga uchib ketdi.
Biroq uchrashuvda faqat g‘alaba yoki durang natija qayd etilsagina, Messining Saudiyaga safariga ruxsat berilgandi. Jamoa murabbiyi Kristof Galte va sport direktori Luish Kampush futbolchini bu bo‘yicha ogohlantirgani ma‘lum bo‘ldi.
Xabarlarga ko‘ra, “PSJ” argentinalik futbolchini 2 haftaga chetlatishga qaror qildi. Shuningdek, 35 yoshli hujumchi jamoa mashg‘ulotlarida ham ikki hafta qatnashmaydi. Klub rahbarlari Messi katta xatoga yo‘l qo‘ygan deb hisoblamoqda. Leo Fransiya chempionati doirasida “Trua” va “Ayachcho”ga qarshi o‘yinlarni o‘tkazib yuboradi. Parij klubi Messiga chetlatilgan muddat uchun maosh to‘lamaydi.
Ma‘lumotlarga ko‘ra, futbolchi Saudiya Arabistoniga uchib ketish uchun “PSJ” rahbariyatidan ruxsat olmagan. Bu klub prezidenti Nossir al-Helayfiga yoqmagan.
L’Equipe nashriga ko‘ra, Parij klubi argentinalik futbolchi bilan shartnomani uzaytirmaslikka qaror qildi. Messining shartnomasi 2022/23-yilgi mavsum oxirida yakuniga yetadi. Bu vaqtda futbolchiga Saudiyaning “Al-Hilol” jamoasidan jiddiy qiziqish bo‘lmoqda. Klub Leo bilan 2023-yilning yozida shartnoma imzolashga harakat qiladi.
Shuningdek, Messining sobiq jamoasi “Barselona” ham argentinalikning qaytishiga ishonmoqda. RMC Sport xabariga ko‘ra, katalon klubi moliyaviy cheklovlarga qaramay, Leo bilan shartnoma imzolaydi.
Avvalroq Leo “Barselona”dan taklif bo‘lishi bilanoq uni qabul qilishi haqida xabar berilgan. Shuningdek, “ko‘k-anorranglilar” murabbiyi Xavi ham Messining Kataloniya jamoasiga qaytishiga ishonishi ma’lum qilingandi.
Izoh (0)